Raphael Maklouf
Raphael David Maklouf, nado en Xerusalén o 10 de decembro de 1937, é un escultor británico de orixe palestina, coñecido por ser o autor dunha efixie de Isabel II utilizada en numerosas moedas británicas e doutros territorios da Comonwealth entre 1985 e 1997.
| Biografía | |
|---|---|
| Nacemento | 10 de decembro de 1937  (86 anos)Xerusalén |
| Datos persoais | |
| País de nacionalidade | Reino Unido |
| Educación | Camberwell College of Arts (en)  |
| Actividade | |
| Ocupación | escultor |
| Lingua | Lingua inglesa |
Traxectoria editar
Raphael Maklouf naceu en Xerusalén, no seo dunha familia xudía do Mandato Británico de Palestina que emigrou ao Reino Unido despois da segunda guerra mundial. Raphael Maklouf asistiu á Escola de Arte de Camberwell, en Londres, desde 1953 ata 1958, onde tivo como profesores a Karel Vogel, Richard Eurich e Gilbert Spencer, e despois converteuse en profesor de Escultura durante dez anos, entre 1958 e 1968.[1][2][3]
Como escultor, é coñecido polo seu conxunto escultórico que representa as quince estacións do Viacrucis na catedral de Brentwood. Tamén creou esculturas de retrato de personaxes como a raíña Isabel II,[4] o príncipe Filipe de Edimburgo,[5] a política Margaret Thatcher, a actriz Joan Collins ou o futbolista Bobby Moore.[3]
Por outra parte, nun certame no que 17 artistas presentaron 38 modelos, o 8 de agosto de 1984 foron seleccionados dous dos deseños propostos por Maklouf para a moeda británica, un para as pezas de circulación ordinaria e outro para as emisións conmemorativas. O seu deseño do busto diademado da raíña Isabel II —coñecido como o "terceiro retrato" da raíña— utilizouse nas moedas non só británicas, senón doutros territorios da Commonwealth desde 1985 ata 1997.[1][6][7] As súas iniciais, RDM, están gravadas a modo de marca de gravador na base do pescozo da raíña.[2]
En 1976, Maklouf fundou a compañía The Tower Mint Ltd., unha ceca privada sita en Londres que produce medallas, moedas para coleccionistas e artigos similares. O 1 de abril de 2017, Tower Mint converteuse na compañía cuñadora oficial das moedas da Illa de Man.[8] Tamén cuña moedas para Xibraltar e outros territorios.[1]
En 1977 ingresou na Royal Society for the Encouragement of Arts, Manufactures and Commerce. En 1979, Maklouf foi nomeado membro asociado da Real Sociedade de Escultores Británicos.[1] Tamén é membro da Royal Society of Arts.[2]
Notas editar
- ↑ 1,0 1,1 1,2 1,3 Chard, L. (2019). "Raphael Maklouf British Coin Engraver". Chards (Chards.co.uk). 1 de marzo.
- ↑ 2,0 2,1 2,2 "Raphael Maklouf". Grangeparkopera (Grange Park Opera.co.uk).
- ↑ 3,0 3,1 "Raphael Maklouf (b.1937)". Artuk.org
- ↑ "Elizabeth II (1926–2022). Raphael Maklouf (b. 1937)". Art.uk
- ↑ "Prince Philip (1921–2021), Duke of Edinburgh. Raphael Maklouf (b. 1937)". Art.uk
- ↑ "Maklouf". Numista.com
- ↑ "Raphael Maklouf". The British Museum.
- ↑ Alexander, M. (2017). "Isle of Man and the Tower Mint: First-strike ceremony for a new coin and a new relationship Arquivado 06 de novembro de 2023 en Wayback Machine.". Coin Update (Coinupdate.com). 13 de marzo.
Véxase tamén editar
Bibliografía editar
- Pery, J. (2018). Raphael Maklouf: Life, Art & The Making of the Mint. Halstar. ISBN 978-1906690656
Ligazóns externas editar
| Predecesor: Arnold Machin |
Moedas da libra esterlina Autores dos anversos 1985-1997 |
Sucesor: Ian Rank-Broadley |