Paseo do Prado

O paseo do Prado é o xardín histórico urbano máis antigo de Madrid, declarado Ben de interese cultural e un dos seus paseos máis importantes e coñecidos. Articúlase segundo un eixe norte-sur, dende a praza de Cibeles ata a praza do Emperador Carlos V, popularmente coñecida como glorieta de Atocha. Á metade do seu percorrido conflúe coa praza da Lealdade e coa praza de Cánovas del Castillo, onde se sitúa a fonte de Neptuno.

Paseo del Prado e Buen Retiro, unha paisaxe de artes e ciencias
Paseo do Prado
Madrid Localización
Patrimonio da Humanidade - UNESCO
País	España
Localización	Madrid
Tipo	Cultural
Criterios	II, IV, VI
Inscrición	2021 (44ª sesión)
Rexión da UNESCO	Europa e América do Norte
Identificador	1618

Xunto cos paseos da Castellana e Recoletos, que se estenden ao norte, conforma un dos principais eixes viarios da cidade, ao conectar a zona setentrional desta coa meridional.

No terreo cultural, o paseo do Prado alberga un dos principais focos museísticos de España. Nel sitúanse os museos do Prado e Thyssen-Bornemisza e nas súas inmediacións áchase o Centro de Arte Raíña Sofía, promovidos turisticamente baixo a denominación de Paseo ou Triángulo da Arte.

Neste paseo tamén se encontran diferentes monumentos e recintos de interese histórico-artístico, levantados no século XVIII dentro do proxecto urbanístico do Salón do Prado, ademais de numerosos motivos ornamentais e paisaxísticos. Destacan o Edificio Villanueva, sede principal do Museo do Prado, o Real Xardín Botánico e os conxuntos escultóricos das fontes de Neptuno, Cibeles e Apolo.

Galería de imaxes

• 
  Pintura de 1637, de Jusepe Leonardo
• 
  Salón do Prado
• 
  Edificio Villanueva do Museo do Prado
• 
  Puerta Real do Xardín Botánico, obra de Francesco Sabatini
• 
  Fonte de Apolo
• 
  Xardín vertical do centro CaixaForum Madrid
• 
  Fonte de Cibeles
• 
  Museo Thyssen-Bornemisza
• 
  Fonte de Neptuno
• 
  Palacio de Comunicaciones
• 
  Edificio do Banco de España

Véxase tamén

Ligazóns externas

• Un percorrido virtual pola historia do «Paseo do Prado e Retiro» para conquistar a Unesco (en castelán)