Leopardo

Leopardo Rango fósil: Plistoceno ata o presente
Estado de conservación
Vulnerable
Clasificación científica
Reino: Animalia Filo: Chordata Clase: Mammalia Orde: Carnivora Familia: Felidae Xénero: Panthera Especie: P. pardus
Nome binomial
Panthera pardus (Linnaeus, 1758)
Distribución do leopardo en liberdade:      Presenza histórica.      Presenza dubidosa.      Presenza moi fragmentada.      Presenza verificada.
Subespecies
9. Véxase o texto
Sinonimia
Felis pardus Linnaeus, 1758

O leopardo ou pantera (Panthera pardus), é unha especie de mamífero da orde dos carnívoros e da familia dos felinos. Coma os outros tres grandes felinos do xénero Panthera (o león, o tigre e o xaguar), presenta unha modificación no óso hioide que lle permite ruxir. O leopardo é denominado comunmente pantera ou pantera negra cando a súa pelaxe presenta unha cor completamente escura por mor do melanismo. Este fenómeno tamén se da entre os xaguares americanos, coa diferenza de que nos leopardos débese a un alelo recesivo e nos xaguares a un alelo dominante.

Características

Leopardo melánico, ou pantera negra.

Os leopardos habitan todo tipo de hábitats, salvo os desertos, sempre que teñan onde se acochar e alimento abondo. Así, atópanse en selvas, sabanas, lugares rochosos, zonas de cultivos etc. Na antigüidade o leopardo era abondoso en toda África e na metade sur de Asia. Daquela, nalgunhas culturas era considerado un cruzamento entre león e pantera, como se reflicte no seu nome, que se compón das palabras gregas λέων leōn (león) e πάρδος pardos (pantera macho). Actualmente é moito menos frecuente atopalo en Asia, pero segue tendo unha presenza importante na zona central de África.

O leopardo ten a cabeza redonda e a cola longa e fina. As súas patas son potentes, con 4 dedos nas patas de atrás e 5 nas de diante, sendo tódalas súas garras retráctiles. As diversas subespecies presentan tamaños moi variados. Acadan unha lonxitude de 91 a 191 centímetros sen ter en conta a cola, que pode medir de 58 a 110 cm. A altura pode variar entre 45 e 78 centímetros. Os machos adultos chegan a pesar entre 37 e 90 quilogramos, e as femias entre 28 e 60.

A súa alimentación consiste en animais medianos ou pequenos. Na súa dieta inclúense monos, porcos, cervos, chacales, antílopes, aves, gando etc. Adoita gardar parte da súa caza nas árbores para non ter que comer ás presas e que lle rinda varios días. Os leopardos cazan preferentemente pola noite e descansan polo día, ocupando covas ou pólas das árbores, dende as que tamén vixían a presenza de presas ou de ameazas como leóns, hienas ou tigres.

Subespecies

Malia que no pasado houbo máis subespecies que hoxe están extinguidas, na actualidade existen 8 ou 9 subespecies de leopardo:

• Panthera pardus pardus - leopardo africano.
• Panthera pardus orientalis - leopardo de Amur.
• Panthera pardus fusca - leopardo da India.
• Panthera pardus delacouri - leopardo de Indochina.
• Panthera pardus saxicolor - leopardo de Persia.
• Panthera pardus melas - leopardo de Xava.
• Panthera pardus japonensis - leopardo chino do norte.
• Panthera pardus nimr - leopardo de Arabia (ás veces inclúese dentro do leopardo persa).
• Panthera pardus kotiya - leopardo de Sri Lanka.

Véxase tamén

Ligazóns externas

• O leopardo en theanimalfiles (en inglés)

---

Este artigo sobre zooloxía é, polo de agora, só un bosquexo. Traballa nel para axudar a contribuír a que a Galipedia mellore e medre.  Existen igualmente outros artigos relacionados con este tema nos que tamén podes contribuír.

---