Nicolaus Michael Oppel

Nicolaus Michael Oppel (ás veces escrito o sen nome como Nikolaus), nado na vila de Schönficht, Alto Palatinado (hoxe no Land de Baviera) o 7 de decembro de 1782, e finado en Múnic o 16 de febreiro de 1820, foi un zoólogo especializado en herpetoloxía, taxónomo e ilustrador alemán.

Nicolaus Michael Oppel

Biografía
Nacemento	7 de decembro de 1782 Schönficht, Alemaña
Morte	16 de febreiro de 1820 (37 anos) Múnic, Alemaña
Actividade
Ocupación	zoólogo
Obra
Abreviatura do autor en zooloxía	Oppel
Descrito pola fonte	Allgemeine Deutsche Biographie

Traxectoria

Oppel foi alumno e traballou como asistente de André Marie Constant Duméril (1774-1860) no Museo Nacional de Historia Natural de Francia de París catalogando e clasificando especies de réptiles.

En 1811 publicou un libro titulado Die Ordnungen, Familien und Gattungen der Reptilien, als Prodrom einer Naturgeschichte derselben (As ordes, familias e xéneros dos réptiles, como un pródromo dunha Historia Natural dos mesmos) no que estableceu a orde dos Squamata (escamosos) e as familias dos Cheloniidae (queloníidos) e os Colubridae (colúbridos), e a subfamilia dos Crotalinae (crotalinos), así como varios xéneros que aínda usan os taxónomos na actualidade.

Con Friedrich Tiedemann (1781-1861) e Joseph Liboschitz (1783-1824), foi coautor de Naturgeschichte der Amphibien (Historia Natural dos anfibios), publicada en 1817.

Outras obras debidas a Oppel son:

• Sur la classification des reptiles (1811).
• Calendarium anni millesimi quadringentesimi undecimi: ex laminis ligneis perantiquis in bibliotheca sua asservatis arte Lithographiae anno 1796 ab Aloisio Senefelder inventae descriptum (1814). (Con Carl Erenbert Moll, Hermann Mitterer e Alois Senefelder).

Abreviatura

A abreviatura Oppel emprégase para recoñecer a Nicolaus Michael Oppel como autoridade na descrición e taxonomía en zooloxía.