La Conquista del Estado
La Conquista del Estado foi un semanario político español fundado o 14 de marzo de 1931 (un mes antes da proclamación da Segunda República) por Ramiro Ledesma Ramos. Publicáronse 23 números, aparecendo o derradeiro o 24 de outubro de 1931.
La Conquista del Estado Semanario de lucha y de información política | |
---|---|
Fundación | 14 de marzo de 1931 |
Remata | 24 de outubro de 1931 |
Director | Ramiro Ledesma Ramos |
Fundador | Ramiro Ledesma Ramos |
Tendencia | fascista |
Lingua | castelán |
Localidade | Madrid |
Periodicidade | semanal |
[ editar datos en Wikidata ] |
Obxectivos políticos
editarDe corte fascista, estaba inspirado na publicación homónima italiana de Curzio Malaparte (La Conquista dello Stato) e pretendía converterse no embrión do fascismo español desde un punto de vista teórico.
No seu primeiro número publicou un manifesto cuxas ideas-forza eran: supremacía do Estado, afirmación nacional, articulación comarcal de España e estrutura sindical da economía (nacionalsindicalismo). O periódico incluíu ademais 17 puntos básicos, que destacaban os seus obxectivos primordiais.[1]
Revolución Nacional e Social
editarDeclaradamente partidaria do fascismo, en todos os números insístese na idea de revolución, que se enfronte tanto ao marxismo como ao capitalismo, enfocándose na chamada terceira vía e facendo continuas loas tanto á Italia fascista como ao Partido Nacionalsocialista de Adolf Hitler, que chegou dous anos despois ao poder. Tamén foi moi combativo co independentismo, en especial o catalán, ao que dedicou varios artigos de clara oposición.
Tamén intentou recrutar aos descontentos dalgúns movementos revolucionarios proletarios, fundamentalmente membros da CNT, asistindo ao Congreso Extraordinario de 1931 da organización anarcosindicalista e apoiando a Folga da Telefónica convocada por estes.[2]
Colaboradores
editarO principal colaborador foi Juan Aparicio López.[3] Posteriormente, engadíronse outros como Manuel Souto Vilas.
Fin do semanario e fundación das JONS
editarLogo de sufrir dificultades económicas pola censura estabelecida na Lei de Defensa da República (1931), anunciou en outubro o final da súa andaina. O grupo de simpatizantes arredor do semanario promoveron a fusión coas Juntas Castellanas de Actuación Hispánica, dirixidas por Onésimo Redondo, dando lugar, o 10 de outubro de 1931,[4] á formación dunha nova organización política e un novo semanario co mesmo nome, Juntas de Ofensiva Nacional-Sindicalista (JONS), que se converteu no primeiro partido nacionalsindicalista de España.
Notas
editar- ↑ La Conquista del Estado, nº 1, 14 de marzo de 1931.
- ↑ La Conquista del Estado, nº 18, 11 de xullo de 1931.
- ↑ "La conquista del estado". Proyecto Filosofía en español (en castelán). Arquivado dende o orixinal o 01-06-2020. Consultado o 19-9-2019.
- ↑ Sesma (2012), p. 56
Véxase tamén
editarBibliografía
editar- Sesma Landrín, Nicolás (2012). "La dialéctica de los puños y de las pistolas": una aproximación a la formación de la idea de estado en el fascismo español (1931-1945)". Historia y Política: Ideas, Procesos y Movimientos Sociales (en castelán) (27): 51–82. ISSN 1575-0361. doi:10.18042/hp.
Outros artigos
editar- Ramiro Ledesma Ramos
- Juntas Castellanas de Actuación Hispánica
- Juntas de Ofensiva Nacional-Sindicalista