Jacinto Calvo López
Jacinto Calvo López, nado en Viveiro o 4 de xullo de 1903 e finado en Lugo o 24 de xullo de 1993, foi un confeiteiro e político galego.
| Biografía | |
|---|---|
| Nacemento | 4 de xuño de 1903  Viveiro, España |
| Morte | 24 de xullo de 1993 (90 anos) A Coruña, España |
 Senador de España | |
| | |
| Datos persoais | |
| País de nacionalidade | España |
| Actividade | |
| Ocupación | político , empresario |
| Partido político | Partido Socialista Obrero Español |
| Lingua | Lingua castelá |
Traxectoria editar
Trasladouse coa familia a Lugo, onde se estableceron como pasteleiros. Aprendeu o oficio familiar e traballou co pai. Ingresou en 1923 na Unión General de Trabajadores (UGT) e en 1931 no Partido Socialista Obrero Español (PSOE). Foi secretario xeral de ambas as formacións na capital lucense e tamén da Federación provincial do PSOE, tesoureiro da Federación Provincial de Traballadores de Lugo (1932) e presidente da Casa del Pueblo (1935). Foi candidato a deputado nas eleccións xerais de 1933 e de 1936, pero no saíu elixido. Durante a folga xeral revolucionaria de 1934 foi membro do comité revolucionario local, polo que foi procesado e condenado a prisión. En abril de 1936 foi elixido compromisario para a elección do presidente da República e participou na redacción do Estatuto de autonomía de Galicia de 1936. Ao producirse o golpe de Estado do 18 de xullo de 1936, participou na chamada á formación de milicias para deter ás tropas acuarteladas en Lugo, pero dado o rápido control de Galicia polos alzados, fuxiu a Portugal e despois a Francia.
Regresou en 1951 continuando co negocio familiar. Nas primeiras eleccións democráticas de 1977 foi candidato ao Senado na Candidatura Democrática Galega, pero non foi elixido. Nas eleccións de 1982 e 1986 foi elixido senador polo PSdeG pola provincia de Lugo. Na constitución do Senado en 1982 e 1986, presidiu a sesión constituínte por ser o senador de máis idade.
Logo do seu pasamento constituíuse a Fundación Jacinto Calvo na provincia de Lugo que promove accións destinadas ao desenvolvemento económico e social da provincia, e a socialización do coñecemento e a innovación.