Giovanni Candida

Giovanni Candida, nado en Benevento na segunda metade do século XV e finado na mesma cidade campana no século XVI (non antes de 1504), foi un medallista italiano.

Traxectoria

Giovanni Candida era un crego pertencente á antiga familia Filangieri. Estivo ao servizo da casa de Anjou e, aínda na súa xuventude, trasladouse a Flandres. Logo desenvolveu a súa actividade artística principalmente na corte de Borgoña (desde 1472), onde ocupou o cargo de secretario de Carlos I, duque de Borgoña. Nesta corte confiáronselle tamén algunhas misións diplomáticas. Entre outros destinos, foi eviado en misións negociadoras a Venecia en 1473 e 1478, e a Roma en 1475 e en 1476, e foi observador na Dieta de Augsburgo en 1474.

Á morte do duque de Borgoña, entrou ao servizo de Maximiliano I de Habsburgo e, finalmente, de Carlos VIII de Francia, xa na segunda metade do século XV. Sábese moi pouco acerca da vida que levou Candida na súa nova corte; descoñécese mesmo cales foron as súas funcións durante o reinado de Luís XI (1461-1483).

Candida soubo asociar a arte da medallística á súa actividade diplomática, o que lle reportou unha gran sona en Borgoña. Gravou medallas para os seus amigos e protectores, e retratou tanto a grandes como a pequenos personaxes das políticas borgoñoa e francesa, como Maximiliano de Habsburgo, María de Borgoña, Carlos o Temerario ou Robert Briçonnet.

A principios do reinado de Carlos VIII (1483-1498) exerceu tamén como historiador. Sábese que compuxo un resumo da historia de Francia titulado Historia Francorum abbreviata a Troiana urbe usque ad Carolum VIII, así como un tratado para lexitimar as pretensións de Carlos VIII ao trono do Reino de Nápoles.

Nas súas medallas, Candida adoitaba incluír, a modo de sinatura de gravador, as marcas CAND, CANDID, OPUS CAND ou CANDIDA.

Escolma de traballos

• 
  Carlos o Temerario, duque de Borgogna (ca. 1474).
• 
  Maximiliano I de Habsburgo como arquiduque de Austria.
• 
  Diomede Carafa, primeiro conde de Maddaloni (1406-1487).
• 
  Giuliano della Rovere (1443-1513) .
• 
  Margherita de Chassey (1479).
• 
  María de Borgoña.
• 
  María de Borgoña.
• 
  Carlos o Temerario, duque de Borgogna

Véxase tamén

Bibliografía

• Forrer, L. (1904). "Candida, Giovanni". En Biographical dictionary of medallists. Vol. 1. Londres. Páxinas 334-338.

• Scheurer, R. (1974). "Candida, Giovanni (Jean)". En: Ghisalberti, A. M. (ed.): Dizionario Biografico degli Italiani. Vol. 17. Istituto della Enciclopedia Italiana, Roma.
• Börner, L. (1983). "Giovanni Candida, Medaille Erzherzog Maximilian und Maria von Burgund". En Kunst der Reformationszeit, Berlín. Páxina 170.

Outros artigos

• Historia da medalla italiana
• Historia da medalla francesa