Faro de illa Pancha
Coordenadas: 43°33′24″N 7°02′31″O / 43.556534, -7.041978
.jpg)
| |
| Datos xerais | |
|---|---|
  Faro Illa Pancha | |
| Localización xeográfica | Illa Pancha |
| Localización municipal | Ribadeo, provincia de Lugo |
| Construción | 1859 (vello) - 1983 (en uso) |
| Datos técnicos - faro en uso | |
| Código internacional | D-1660 |
| Descrición | Torre circular |
| Altura sobre o nivel do mar | 28 metros |
| Altura sobre o terreo | 13 metros |
| Características | Gp D (3+1) B 20s |
| Período | 0.5+<2.0>+0.5+<2.0>+0.5+
<7.0>+0.5+<7.0>=20 |
| Alcance | 21 millas náuticas |
O vello faro de illa Pancha atópase na illa Pancha, na parte máis occidental da ría de Ribadeo. Foi comezado a construír en 1857.[1][2] Comparte illa co novo faro, o único en funcionamento como tal dende 1983.
Pertence ó Dominio Público Portuario do servizo de sinalización marítima.[3] Dende 1993 depende da Autoridade Portuaria de Ferrol-San Cibrao.
Historia editar
Planeado como unha luz de terceira orde destinada a alumear a entrada á ría e ao porto de Ribadeo, e contratado o 31 de maio de 1857[1], este faro inaugurouse o 30 de decembro de 1859 cun alcance de 9 millas náuticas. Unha real orde do 29 de novembro de 1860 dispuxo o seu acendido para o 30 do mes seguinte coa aparencia de luz fixa vermella e 9 millas de alcance. Este faro estivo activo ata o 1 de outubro de 1983,[4] data na que entrou en funcionamento o novo faro.
O proxecto do enxeñeiro Marcelo Sánchez Movellán, cun orzamento de 47 500 reais, ideou unha luz simétrica, elevada 9 m sobre o terreo (24 m sobre o nivel do mar), coa torre cadrada de 3,5 m de lado e 6,7 m de altura encaixada no centro dun edificio de planta cadrada e 128 m² de superficie[3] para así protexela dos temporais. A torre remata nun balcón de ferro forxado e unha torre octogonal para soportar a lanterna hexagonal de vidros planos.
En 1858 engadiuse unha ponte de ferro sobre tres piares ancorados en dous illotes. Como faro de illa, e a categoría da súa luz, debía estar atendido por dous torreiros; con todo, para economizar no servizo e suprimir un encargado decidiuse construír unha ponte de unión con terra. En 1883 substituíuse a lámpada por unha de petróleo dunha mecha. En 1917 entrou en servizo un xogo de pantallas para producir ocultacións.[5]
No último terzo do século XX foi construído un segundo faro na illa, o único que funciona dende 1983, se ben o vello faro aínda mantén montada a lente de Fresnel. O novo faro ten unha torre illada con lanterna de montantes inclinados, acadando a súa luz as 21 millas náuticas. É un dos 187 do patrimonio administrado por Portos do Estado (dependente do Ministerio de Fomento).
Coa adopción do faro no 1993 pola Autoridade Portuaria de Ferrol - San Cibrao instalouse un sistema de alimentación de reserva composto por baterías encargadas de subministrar a corrente continúa en caso de fallo da rede eléctrica. Tamén foi monitorizado o faro na súa totalidade para ser supervisado dende o centro de control situado no porto de Ferrol.
En 2002 realizáronse actuacións na illa para mellorar a contorna dos faros antigo e novo. No ano 2004 reforzouse a ponte de acceso á illa. No ano 2006 substituíuse o equipo luminoso de reflectores por unha lanterna de óptica xiratoria con paneis de Fresnel e con cambiador de lámpada principal e outra de reserva de 70 W.
No ano 2014 comezou o proceso para que o vello faro sexa usado coma hotel no marco da iniciativa 'Faros de España', contando con oposición veciñal.[6][7] En abril de 2017 comezou a actividade como apartamentos turísticos con dúas habitacións.
Notas editar
- ↑ 1,0 1,1 "Faros de la Autoridad Portuaria de Ferrol - San Ciprián". La web de un farero. Consultado o 9/12/2016.
- ↑ "Faro de Isla Pancha". Diario de mi muerte. As obras foron poxadas o 31 de maio de 1857.
- ↑ 3,0 3,1 Pepa Martín (outubro 2015). "Una luz más constante" (PDF). Revista de Fomento (en castelán). Arquivado dende o orixinal (PDF) o 20 de agosto de 2016. Consultado o 27 de xuño de 2018.
- ↑ J.Alonso (5/3/2016). "La tramitación de la licencia municipal retrasa el proyecto del faro de Illa Pancha".
- ↑ "D1660 Faro de Isla Pancha". Vuelta Ibérica de los faros. Consultado o 21/11/2016.
- ↑ "100.000 euros a obras y 15.600 de alquiler". La Voz de Galicia. 28/10/2015.
- ↑ "O Concello reclama informes da Xunta e o Estado para aprobar o hotel do faro". El Progreso. 28/10/2015.
Véxase tamén editar
Bibliografía editar
- Pazos, Lino (2003). Faros de Galicia. Guías Galaxia. Editorial Galaxia. ISBN 84-8288-636-3.
Outros artigos editar
Ligazóns externas editar
- Mapa dos faros e balizas da Autoridade Portuaria de Ferrol
- Listaxe de faros en Galicia Arquivado 02 de outubro de 2015 en Wayback Machine. (en inglés)