Wikipedia

Edificio do Banco Pastor da Coruña

edificio
Para o edificio de Vigo véxase: Edificio Banco de Vigo.

O Edificio do Banco Pastor é unha construción monumental de 1925 deseñada polos arquitectos Antonio Tenreiro e Peregrín Estellés no Cantón Pequeno da Coruña para sede do Banco Pastor. Foi o edificio máis alto de España ata a construción da sede de Telefónica na Gran Vía de Madrid en 1929.[1]

Edificio do Banco Pastor
Fachada do edificio.
Edificio
LocalizaciónCantón Pequeno, 1
15003, A Coruña
Coordenadas43°22′04″N 8°24′14″O / 43.367824, -8.403815Coordenadas: 43°22′04″N 8°24′14″O / 43.367824, -8.403815
Construción
Inicio1922
Remate1925
Dimensións
Plantas11
Equipo
Arquitecto(s)Antonio Tenreiro e Peregrín Estellés
[ editar datos en Wikidata ]

Historia editar

En 1918 Ricardo Rodríguez Pastor e Pedro Barrié comezaron a comprar parcelas nos Cantóns para construír a sede do seu banco. A partir dese momento comezaron a modificar o tamaño das parcelas, nas que derrubaron os edificios existentes, de tres ou catro pisos con galerías.[2]

O proxecto foi encargado por Pastor e Barrié ao seu parente Antonio Tenreiro en 1919 coa idea de construír unha sede para o seu banco. Tenreiro licenciárase en arquitectura en Madrid ese mesmo ano e estableceuse na Coruña en 1921. O proxecto definitivo é de 1922. A Comisión Municipal de Obras aprobou o proxecto de edificio de 38 metros a pesar de que o máximo aceptado era de 20 metros indicando que o novo e moderno edificio faría máis fermosa a cidade.[2]

O novo edificio foi inaugurado o 11 de novembro de 1925,[2] converténdose no primeiro rañaceos de Galicia.[3]

Descrición editar

 

O edificio, de case corenta metros de altura, ocupa unha parcela de máis de 1000 metros cadrados. Foi deseñados por Antonio Tenreiro, Peregrín Estellés e Emilio Moya, aínda que só asinaron os planos os dous primeiros.[3] É de estilo ecléctico, baseado na arquitectura da Escola de Chicago e nos bancos ingleses e estadounidenses, con elementos decorativos de estilo neobarroco e art déco.[4]

Está construído arredor dun patio que dá luz a todo o edificio, empregando, de xeito pioneiro en Galicia, formigón armado e pedra artificial. A estrutura é semellante a unha columna, cunha base de tres pisos, un fuste con máis desenvolvemento vertical (seis pisos) e un chapitel que forman os dous últimos pisos, con maior decoración.[2] As oficinas do banco situábanse no piso baixo, o entresollado e o primeiro andar; o seguinte andar estaba ocupado pola vivenda de Pedro Barrié e nos demais andares había vivendas. No ático instalaron o seu estudio Tenreiro e Estellés.[5]

A entrada realízase a través dun chafrán entre o Cantón Pequeno e a rúa de Santa Catarina polo que se accede a un vestíbulo no que se situaban as caixas e os mostradores do banco.[5] A planta baixa ilumínase mediante unha vidreira.[4]

En 1959 o edificio foi ampliado cara á rúa de Durán Loriga.[4]

Notas editar

  1. ↑ "El Banco Pastor fue el edificio más alto de España durante siete años". La Voz de Galicia (en castelán). 12-9-2010. Consultado o 6-4-2016. 
  2. ↑ 2,0 2,1 2,2 2,3 "O Banco Pastor da Coruña: o primeiro rañaceos de Galicia". Iniciarte. Consultado o 6-4-2016. 
  3. ↑ 3,0 3,1 "El edificio de Banco Pastor en Coruña". Sociedad de Tasación (en castelán). 13-4-2012. Consultado o 6-4-2016. 
  4. ↑ 4,0 4,1 4,2 Ficha Arquivado 16 de abril de 2016 en Wayback Machine. en Turgalicia
  5. ↑ 5,0 5,1 Agrasar 2002, p. 51

Véxase tamén editar

Bibliografía editar

  • Agrasar, Fernando, ed. (2007). Antonio Tenreiro 1893-1972 (en castelán). COAG. ISBN 978-84-96712-08-9. 
  • Martínez Suárez, Xosé Luís; Casabella López, Xan (1989). Catálogo arquitectura. A Coruña 1890-1940. COAG. p. 126-129. ISBN 978-84-85665-09-9. 

Ligazóns externas editar

Traído desde «https://gl.wikipedia.org/w/index.php?title=Edificio_do_Banco_Pastor_da_Coruña&oldid=6538927»