Consello da Avogacía Galega

O Consello da Avogacía Galega (CAG) é o órgano que aglutina e coordina os colexios da avogacía de Galicia. A el pertencen os colexios da avogacía da Coruña, Lugo, Ourense, Pontevedra, Ferrol, Santiago e Vigo. Ten as mesmas competencias ca o Consello Xeral da Avogacía Española en tanto se refiran unicamente á Comunidade Autónoma de Galicia. Entre elas, a representación da profesión, o exercicio da potestade disciplinaria e o control deontolóxico dos membros da profesión e a formación continua dos profesionais da avogacía.

Consello da Avogacía Galega
Tipo	colexio profesional
Actividade
Campo de traballo	dereito
Data
Fundación	1993
Localización
43°21′51″N 8°24′23″O
Estado	España
Comunidade autónoma	Galicia
Provincia	provincia da Coruña
Concello	A Coruña
Enderezo	Rúa Federico Tapia, 11, 1ºA 15005
Contacto
Páxina WEB	avogacia.gal
Redes
[ Wikidata ]

Creación e traxectoria

Esta Corporación de Dereito Público foi creada por Decreto 130/1993, de 3 de xuño de 1993, da Xunta de Galicia, pola que se aprobaron os seus estatutos. Aglutina, polo tanto, uns 13 500 profesionais, dos que case que 7000 son avogados/as en exercicio.

A sede do Consello da Avogacía Galega está situada na cidade da Coruña, por ser o lugar onde ten á súa sede o Tribunal Superior de Xustiza de Galicia.

Organización e estrutura

O Consello está dirixido por un pleno, ao que pertencen os decanos e decanas dos sete colexios da avogacía galegos. De entre eles, designan a un Presidente. Conta ademais cunha secretaría técnica e diversas comisións para o desenvolvemento dos seus fins.

Foron Presidentes do CAG:

• José Seoane Iglesias (Decano de Ilustre Colexio da Avogacía de Ferrol)
• Alfonso Álvarez Gándara (Decano do ICA de Vigo)
• Javier Álvarez-Santullano Pino (Decano do ICA Santiago)
• Miguel González Trigás (Decano do ICA de Ourense)
• José Antonio López Graña (Decano do ICA de Lugo)
• Jesús Varela Fraga (Decano do ICA da Coruña)
• Eloy Artime Cot (Decano do ICA de Pontevedra)
• Antonio Platas Tasende (Decano do ICA da Coruña)
• Nieves Santomé Couto (Decana do Ilustre Colexio da Avogacía de Ferrol).
• Evaristo Nogueira Pol (Decano do Ilustre Colexio da Avogacía de Santiago).
• Félix Mondelo Santos (Decano do ICA de Lugo)
• Ramón Jáudenes López de Castro (Decano do ICA de Pontevedra)
• Pilar López-Guerrero Vázquez , Decana do Ilustre Colexio da Avogacía de Ourense
• Lourdes Carballo Fidalgo, Decana do Ilustre Colexio da Avogacía de Vigo
• Augusto José Pérez-Cepeda Vila, Decano do Ilustre Colexio de Avogados da Coruña

Recoñecementos

• No ano 2008, a Fundación Lois Peña Novo outorgou ao Consello o seu Premio "pola transcendencia dun labor corporativo eficazmente planificado de cara á extensión e mellora do uso do galego en tódolos ámbitos da administración de xustiza, así como en cada sector institucionalmente relacionado coa avogacía"
• No ano 2020, o Goberno de España, por solicitude da Delegación do Goberno en Galicia, entregou o Premio Meninas 2020 a Consello da Avogacía Galega, polo labor da avogacía de oficio de Galicia na defensa das mulleres vítimas de violencia de xénero.

Actividades

Ademais das funcións tradicionais de natureza administrativa, como a tramitación e resolución de recursos en materia deontolóxica e as relacións con outras institucións e administracións, o Consello da Avogacía Galega na actualidade dedica esforzos no ámbito da formación dos avogados e avogadas de Galicia, mediante o establecemento dun programa en materias do exercicio profesional coma mediación, dereito de estranxeiría, procedemento penal do menor, violencia sobre a muller, deontoloxía profesional, etc.

Ademais o Consello da Avogacía Galega apoiou desde 2006 a consecución do dominio para a cultura e lingua galega en Internet .gal, formando parte do órgano de goberno da entidade promotora, a Asociación Puntogal na actualidade.