Christopher Tolkien

Christopher John Reuel Tolkien, nado en Leeds, Inglaterra, o 21 de novembro de 1924 e finado en Draguignan o 15 ou 16 de xaneiro de 2020, foi mellor coñecido como o fillo do escritor John Ronald Reuel Tolkien, do que era o segundo fillo máis vello, e mais como o editor da maior parte do traballo do seu pai, publicado de maneira póstuma.

Christopher Tolkien
Nome completo	Christopher John Reuel Tolkien
Nacemento	21 de novembro de 1924
Lugar de nacemento	Leeds
Falecemento	16 de xaneiro de 2020
Lugar de falecemento	Draguignan
Nacionalidade	Reino Unido e Francia
Alma máter	Dragon School, Trinity College, Oxford e The Oratory School
Ocupación	escritor, editor literario, profesor universitario e novelista
Pai	J. R. R. Tolkien
Nai	Edith Bratt
Cónxuxe	Faith Tully Lilly Faulconbridge e Baillie Tolkien
Fillos	Adam Tolkien, Simon Tolkien e Rachel Clare Reuel Tolkien
Irmáns	John Tolkien e Priscilla Reuel Tolkien
Premios	Bodley Medal
Na rede
[ editar datos en Wikidata ]

Traxectoria

Os Tolkien: pai e fillo

Tolkien pai escribiu moitísimo material vinculado á mitoloxía da Terra Media, que non foi publicado mentres vivía; aínda que orixinalmente a súa intención era publicar O Silmarillion xunto con O Señor dos Aneis, e xa había partes moi desenvolvedas, morreu en 1973 deixando o proxecto inconcluso.

Christopher foi sempre parte da audiencia crítica da fición do seu pai, primeiro como neno, escoitando as historias de Bilbo Bulseiro, e logo como un adolescente e novo adulto, retroalimentando o seu pai en O Señor dos Aneis durante os últimos anos da súa xestación, e incluso participando nos debates literarios dos Inklings. O propio Christopher asignouse a tarefa de interpretar os, a miúdo, confusos mapas da Terra Media, co fin de xerar as versións mostradas nos libros. Christopher redebuxou o mapa principal a finais dos 70, para aclarar as letras e corrixir algúns erros e omisións.

Posteriormente, o fillo seguiu os pasos do pai, converténdose en lector e titor de Lingua inglesa na Universidade de Oxford.

Morte do pai

Tras a morte do seu pai, Christopher púxose a organizar todas as notas do seu pai, algunhas das cales estaban escritas en vellos recortes de papel. Moito do material estaba escrito á man, con frecuencia un simple esbozo estaba escrito sobre outro esbozo anterior, e os nomes das personaxes cambiaban continuamente entre o comezo e o fin do mesmo texto. Descifrar isto foi unha ardua tarefa, e talvez só alguén coa proximidade ao autor que posuía Christopher, e tan coñecedor na evolución das historias, podía facer que todo concordase. Aínda así, Christopher admitiu que moitas veces tivo que adiviñar o que o seu pai quixo dicir.

Non obstante, ao traballar con Gui Gavriel Kay, puido publicar O Silmarillion en 1977, seguido dos Contos inconclusos de Númenor e a Terra Media en 1980, e os doce volumes de The History of Middle-earth, entre 1983 e 1996.