Alberto Juantorena

Alberto Juantorena Danger, nado en Santiago de Cuba o 3 de decembro de 1950, é un atleta cubano especialista nas probas de 400 e 800 metros, que se proclamou campión olímpico de ambas as distancias nos Xogos de Montreal 1976, algo que ninguén conseguira antes. Recibía o alcume de "O Cabalo".

Alberto Juantorena
Nacemento	3 de decembro de 1950 e 21 de novembro de 1950
Lugar de nacemento	Santiago de Cuba
Nacionalidade	Cuba
Ocupación	mediofondista, velocista, atleta e político
Premios	Ordem Olímpica
Na rede
[ editar datos en Wikidata ]

Alberto Juantorena, á dereita, nos Campionatos do Mundo de Atletismo, Osaka 2007.

Cadro de medallas
Atletismo
Xogos Olímpicos
Ouro	Montreal 1976	400 m
Ouro	Montreal 1976	800 m

Traxectoria

Empezou no deporte xogando ao baloncesto, deporte no que destacaba pola súa grande altura (1'88), ata que foi descuberto en 1971 polo adestrador polaco de atletismo Zygmunt Zabierzowski, quen lle convenceu para empezar a correr.

Só un ano máis tarde participou nos Xogos Olímpicos de Múnic 1972, onde foi eliminado nas semifinais dos 400 metros. Nos anos seguintes comezou a cultivar éxitos en diferentes competicións. Gañou o ouro nos Xogos Mundiais Universitarios de Moscova en 1973, e a prata nos Xogos Panamericanos de Cidade de México en 1975, sempre na proba de 400 metros.

Non empezou a correr en serio nos 800 metros ata 1976, o ano dos Xogos Olímpicos de Montreal. En Montreal era un dos favoritos para gañar o ouro nos 400 metros, pero ninguén contaba con el para a vitoria nos 800 metros. Nesta proba os grandes favoritos eran o belga Ivo Van Damme e o estadounidense Rick Wolhutter, vixente plusmarquista mundial. Juantorena sorprendeulles a ambos e gañou a medalla de ouro cunha nova marca do mundo de 1:43,50; Van Damme foi prata e Wolhutter bronce.

Tres días máis tarde gañou a final dos 400 metros con 44,26, que sería a mellor marca da súa vida nesta proba, vencendo aos estadounidenses Fred Newhouse e Herman Frazier, prata e bronce respectivamente. Juantorena dedicoulle o seu triunfo á Revolución Cubana e ao Comandante Fidel Castro.

Era o primeiro atleta na historia que facía o dobrete nos 400 e os 800 metros nuns Xogos Olímpicos, algo que ninguén volveu a repetir. Normalmente considerábase que os 400 e os 800 metros eran dúas probas incompatibles ao máis alto nivel, pois a primeira era basicamente de velocidade e a segunda de mediofondo. Juantorena demostrou que era posible ser o mellor do mundo en ambas ao mesmo tempo.

Tras os Xogos Olímpicos continuou sendo o mellor en 1977, ano en que dominou as clasificacións mundiais de 400 e 800 metros, e gañou ambas as probas na Copa do Mundo de Düsseldorf. O 21 de agosto dese ano logrou en Sofía mellorar a súa propia marca mundial dos 800 metros, con 1:43,44.

Nos Xogos Panamericanos de San Juan de Porto Rico en 1979 só conseguiu ser segundo nas súas dúas probas. Nos Xogos Olímpicos de Moscova 1980 non participou nos 800 metros por considerar que non tiña moitas opcións nesta proba. Aspiraba ao triunfo nos 400 metros, pero non logrou pasar da 4ª praza con 45,09. A súa última gran competición internacional foron os Mundiais de Helsinqui de 1983, onde tras pasar a primeira rolda dos 800 metros, sufriu unha lesión nun pé e non puido seguir competindo.

Tras a súa retirada do atletismo desempeñou diferente cargos vinculados a deporte en Cuba. Actualmente é Viceministro de Deportes e presidente da Federación Cubana de Atletismo.

Resultados

Ano	Competición	Lugar	Posto	Marca
1975	Xogos Panamericanos	Cidade de México, México	2º en 400 m 2º en 4x400 m	44,80 3:02,82
1976	Xogos Olímpicos	Montreal, Canadá	1º en 400 m 1º en 800 m	44,26 1:43,50
1977	Copa do Mundo	Düsseldorf, RFA	1º en 400 m 1º en 800 m 3º en 4x400 m	45,36 1:44,04 3:02,77
1979	Xogos Panamericanos	San Xoán, Porto Rico	2º en 400 m 2º en 800 m 3º en 4x400 m	45.24 1:46,4 3:06,3
1980	Xogos Olímpicos	Moscova, URSS	4º en 400 m	45,09

Mellores marcas

• 400 metros: 44'26" (Montreal, 29 de xullo de 1976)
• 800 metros: 1:43'44" (Sofía, 21 de agosto de 1977)

Véxase tamén

Ligazóns externas

• www.olympic.org