Ursus americanus floridanus

Ursus americanus floridanus é unha subespecie do oso negro americano, xeralmente chamada oso negro de Florida, que historicamente vivía nos Estados Unidos na maior parte de Florida e partes sur de Alabama, Xeorxia e Mississippi, aínda que agora vive principalmente en zonas protexidas. Viven en áreas forestais e están sufrindo pola redución do seu hábitat.

Descrición

Teñen un corpo grande con pelame negro brillante, un fociño marrón claro e un rabo curto e groso. Tamén é común que teñan unha mancha branca no peito. Actualmente é o mamífero terrestre máis grande de Florida, cun peso medio de 140 kg e algúns exemplares que chegan aos 230 kg. As femias xeralmente pesan menos. Un adulto medio mide entre 120 e 180 cm de lonxitude, e ten unha altura ata a cruz entre 76 e 110 cm.

Comportamento

Son animais principalmente solitarios, excepto cando se xuntan en grupos ou en parellas durante a estación de apareamento. Aínda que son animais solitarios, en xeral, a maioría non son territoriais, e normalmente non defenden a súa área doutros osos. Os osos negros teñen unha boa vista, oído agudo e excelente olfacto . Autorregulan as poboacións segundo as calorías dispoñibles para comer. Unha vez que se produce a fecundación, o cigoto multiplícase ata chegar ao estado de blástula, a cal deixa de crecer ata o inverno, e despois, durante o período de hiperfaxia, se a nai comeu suficientes calorías, a blástula empeza a crecer de novo. Nalgúns casos, se a nai ten acceso a moita comida orixínanse varios xemelgos. Este atraso no crecemento do embrión denomínase diapausa embrionaria.

Hábitat

Vive principalmente en hábitats forestais, e son comúns en zonas arbustivas con Pinus clausa, bosques mixtos do sueste de Florida e zonas húmidas. É a única subespecie de osos que vive na rexión subtropical. En menor extensión habita en praderías secas e bosques tropicais.

Área de distribución

Antes de que Florida fose colonizada polos europeos, este oso ocupaba toda Florida, incluíndo moitas das illas ou caios. A área actual é moito máis esporádica con grupos illados que viven principalmente en áreas protexidas de Florida, e no sur dos estados de Alabama, Xeorxia e Mississippi. As áreas protexidas onde viven as maiores poboacións son o Bosque Nacional Ocala, a Reserva Nacional do Gran Ciprés, o Parque Naciona dos Everglades, o Bosque Nacional Apalachicola, o Bosque Nacional Osceola e o Refuxio Nacional de Vida ilvestre de Okefenokee. Un estudo da poboación de Okefenokee-Osceola atopou 500 osos nas áreas estudadas. A poboación actual en Florida estímase en máis de 4 000 osos.

Dieta

Son omnívoros cunha dieta que varía moito coas estacións, principalmente porque moitas das súas especies preferidas para comer de flora e fauna son estacionais. En primavera come principalmente as plantas Sabal palmetto, Thalia geniculata, e Sus scrofa (porco bravo), Bombus bimaculatus (heminópteros) e especies de Camponotus (formigas). No verán come principalmente as plantas Serenoa repens, Ilex glabra, Rubus, Phytolacca rigida, Vaccinium, as formigas Camponotus e o fasmatodeo Anisomorpha buprestoides. En outono, come as plantas Serenoa repens, Ilex glabra, Nyssa biflora, e os heminópteros Vespula e Apis mellifera e tamén Dasypus novemcinctus (armadillo)

Conservación

Oso negro morto nun accidente de tráfico nunha estrada de Florida.

A perda de hábitats está afectando moito ás poboacións do oso negro de Florida. Cada hora pérdense case 81 000 m². Os osos son feridos ou matados en accidentes de tráfico (desde 1976 houbo máis de 1 356 casos documentados de mortes) en Florida. Os accidentes son a súa principal causa de morte en Florida (89,5% dos osos mortos) desde 1994. En Florida estaba prohibida a súa caza desde 1994, mais isto foi despois revisado.

Revisión do seu status

En 2012 a Comisión de Vida Silvestre e Pesca de Florida (FWC) quitou a esta subespecie da súa lista de especies ameazadas baseándose no seu tamaño de poboación segundo datos non actualizados desde 2002, a pesar da preocupación expresada por algúns biólogos pola perda de diversidade xenética e endogamia. Pero seguía sendo ilegal "danar ou matar a un oso neste estado, ou posuír ou vender partes do oso."

En 2015 a FWC aprobou a caza deste oso a pesar da oposición pública. Porén, en 2016, votouse adiar para o futuro a decisión de renovar o permiso para cazalo. Tomáronse medidas para reducir a interacción entre humanos e osos e utilizar cubos do lixo resistentes aos osos.

En 2016 varios grupos conservacionistas de Florida solicitaron ao Departamento do Interior dos Estados Unidos que o oso negro de Florida fose incluído na lista federal da Lei de Especies en Perigo norteamericana.