Shang jun shu
Shang jun shu (chinés tradicional: 商君書; chinés simplificado: 商君书; pinyin: Shāng jūn shū; Wade-Giles: Shang chün shu), en galego O libro do señor Shang, é un libro chinés do século III a.C., considerado como o texto fundacional do legalismo.[1] Xunto co Han Feizi, é a obra máis antiga conservada desta escola de pensamento.[2] Atribúeselle ao ministro Shang Yang, que serviu baixo o duque Xiao da dinastía Qin, converténdose no pai do legalismo de estado.[3]
| Shang jun shu (商君書) | |
|---|---|
 Busto de Shang Yang (390 a.C.-338 a.C.) | |
| Autor/a | Shang Yang |
| Orixe | China |
| Lingua | Chinés clásico |
| Xénero(s) | Ensaio |
| Data de pub. | Século III a.C. |
| [ editar datos en Wikidata ] | |
Tradición textual editar
Algúns capítulos d'O libro do señor Shang foron escritos décadas ou incluso séculos despois da morte de Shang Yang, polo que non se lle considera o autor da totalidade da obra. Porén, algúns capítulos poderían ter sido escritos polo propio Shang Yang e os seus discípulos inmediatos. Con todo, a obra presenta unha certa coherencia ideolóxica, o que amosa a evolución e desenvolvemento dunha corrente intelectual unificada.[2]
Contidos editar
O libro inclúe un gran número de ordenanzas, ensaios e peticións á corte atribuídas ao señor Shang, así como discursos seus pronunciados perante a corte. O seu interese principal é o mantemento da orde social a través dun sistema estrito de leis imparciais que establezan recompensas e castigos polos actos dos cidadáns. O primeiro capítulo aconsella promover a agricultura e eliminar outras actividades secundarias que non sexan prioritarias. Así mesmo, exalta as virtudes marciais e recomenda a creación dun exército estatal para a conquista de novos territorios.[4]
Unha das súas ensinanzas principais é que "a lei é unha expresión de amor polo pobo (...) O sabio, se é quen de reforzar o estado, non debe seguir o modelo da antigüidade; se é quen de beneficiar ao pobo, non debe adherirse aos ritos establecidos".[5] Así, opónse ao confucianismo, que defende a énfase nos ritos e no respecto ás normas das dinastía pretéritas.
Do mesmo xeito que o Han Feizi, critica o anacronismo das políticas do pasado distante, tomando exemplos da historia recente.[6] Non obstante, a diferenza do Han Feizi, Shang Yang considera que a necesidade de normas estritas podería desaparecer coa constitución dunha sociedade cuxas políticas estivesen orientadas pola moral.[2]
Traducións editar
- Levi, J. (1981). Le Livre du prince Shang. Flammarion.
- Pines, Y. (2017). The Book of Lord Shang: Apologetics of State Power in Early China. Columbia University Press.
- Shimizu, K. 清水潔 (1970). Shōshi 商子. Meitoku shuppansha 明徳出版社.
- Vogelsang, K. (2017) Shangjun shu – Schriften des Fürsten von Shang. Alfred Kröner Verlag.
Notas editar
- ↑ Shaughnessy, Edward L. (2023). A Brief History of Ancient China (en inglés). Bloomsbury Academic.
- ↑ 2,0 2,1 2,2 Pines, Yuri (2014). Zalta, Edward N.; Nodelman, Uri, eds. Legalism in Chinese Philosophy (Winter 2014 ed.). Metaphysics Research Lab, Stanford University.
- ↑ Loewe, Michael, ed. (1993). Early Chinese Texts: A Bibliographical Guide (en inglés). The Society for the Study of Early China (University of California).
- ↑ Knechtges e Chang, ed. (2014). Ancient and Early Medieval Chinese Literature: A Reference Guide, Part Two (en inglés). Brill.
- ↑ "Shang Jun Shu : Reform of the Law - Chinese Text Project". ctext.org (en chinés). Consultado o 2023-12-03.
- ↑ Lewis, Mark Edward (1999). Writing and Authority in Early China (en inglés). SUNY Press.
Véxase tamén editar
Bibliografía editar
- Knechtges, D.S. e Chang, T. (eds. 2014). Ancient and Early Medieval Chinese Literature: A Reference Guide, Part Two. Brill.
- Lewis, M.E. (1999). Writing and Authority in Early China. SUNY Press.
- Loewe, M. (ed. 1993). Early Chinese Texts: A Bibliographical Guide. The Society for the Study of Early China (University of California).
- Pines, Y. (2014). Legalism in Chinese Philosophy. The Stanford Encyclopedia of Philosophy.
- Shaughnessy, E.L. (2023). A Brief History of Early China. Bloomsbury Academic.
Ligazóns externas editar
- Obras de Yang Shang (Proxecto Gutenberg)
- 《商君書》(Chinese Text Project)