O talento do señor Ripley
O talento do señor Ripley (en inglés: The Talented Mr. Ripley é unha novela de 1955 escrita por Patricia Highsmith. É a primeira da saga protagonizada por Tom Ripley (coñecida como "the Ripliad", continuada nas novelas Ripley Under Ground, Ripley's Game, The Boy Who Followed Ripley e Ripley Under Water. Foi traducida ao galego por María Alonso Seisdedos e publicada por Kalandraka en 2022.
| O talento do señor Ripley | |
|---|---|
| Título orixinal | The Talented Mr. Ripley |
| Autor/a | Patricia Highsmith |
| Orixe | Estados Unidos |
| Lingua | inglés |
| Colección | Ripliad |
| Xénero(s) | Novela negra |
| Editorial | McCann (EUA) & Cresset Press (R.U.)  Kalandraka |
| Data de pub. | 1955 2022 |
| Seguido por | Ripley Under Ground |
| Tradución | María Alonso Seisdedos |
| [ editar datos en Wikidata ] | |
Sinopse editar
Tom Ripley é un mozo que vive en Nova York, sen ambicións pero cun talento especial para sobrevivir facendo o que faga falta. É requirido polo magnate da construción naval Herbert Greenleaf para ir a Italia a persuadir ó seu fillo errante, Dickie, de que regrese aos EUA e volva ao negocio familiar. Tom ve isto como unha oportunidade. Ao pouco de chegar a Italia vai xunto Dickie e coñece a súa amiga Marge Sherwood, e axiña se integra coa parella. Porén, Marge comeza a sospeitar de Ripley, e Dickie comeza a cansar del e da súa presenza constante e crecente dependencia. O propio Tom decátase de que os ánimos son complicados polo seu desexo de manter o seu novo estilo de vida.
Como un xesto cara a Tom, Dickie accede a viaxar con el nunha pequena escapada a San Remo. Alí alugan un pequeno bote, e Tom asasina a Dickie a bordo. Tira o corpo pola borda, asido á áncora, e afunde o bote.
Tom asume a identidade de Dickie, vivindo dos seus cartos e escribíndolle a Marge para dicirlle que necesita estar un tempo lonxe dela. Freddie Miles, un vello amigo de Dickie, vísitao no seu apartamento de Roma, pero axiña sospeita da presenza de Tom, e este acaba matando a Freddie. A existencia de Tom convértese nun xogo do gato e o can coa policía italiana, e Tom acaba por recuperar a súa identidade e mudarse a Venecia. Posteriormente Marge, o pai de Dickie e un detective contratado por este falan con Tom. Proponse matar a Marge, pero tras comprobar que cren a súa historia decide evitar complicacións. Tom viaxa a Grecia tras facer crer ao pai de Dickie que este lle deixara as súas posesións no testamento. Ao chegar a Atenas comproba que creran a súa historia e que aceptaran a desaparición de Dickie, así como o legado persoal a Tom, que redactara o propio Tom na máquina de escribir do defunto. O libro remata con Tom rico, pero atafegado pola paranoia; nos parágrafos finais asume que vai sospeitar que os policías o van estar agardando en calquera lugar que vaia.
Premios editar
A novela reportou á autora o Premio Edgar Allan Poe dos Mystery Writers of America (escritores de misterio dos Estados Unidos).
Adaptacións editar
- Plein Soleil (tamén coñecida como Purple Noon), dirixida por René Clément en 1960, con Alain Delon como Tom e Maurice Ronet como Dickie.
- The Talented Mr. Ripley, dirixida por Anthony Minghella en 1999, con Matt Damon como Tom.