Observatorio Galego da Biodiversidade

O Observatorio Galego da Biodiversidade (OGB) é un órgano da Consellería de Medio Ambiente, Territorio e Vivenda da Xunta de Galicia, creado en 2008.

A camelia do parque de Castrelos, en Vigo, a máis vella de Galicia.

Funcións

As funcións do OGB son a promoción de accións encamiñadas á conservación da variedade da vida, incluída a variedade xenética dentro dunha mesma especie, así como entre as especies e os ecosistemas, debido á importancia que esta biodiversidade ten para o pobo galego, xa que conforma o marco en que se desenvolve a súa existencia, ao tempo que constitúe unha fonte importantísima de recursos de distinta índole, para as galegas e os galegos.

Estas funcións son:

• Prestar apoio na inventariación, análise e interpretación dos datos sobre o estado da biodiversidade en Galicia.
• Asesorar a Xunta de Galicia na elaboración e seguimento dos indicadores de biodiversidade e no mantemento dun sistema de información sobre a súa evolución.
• Informar, con carácter facultativo e non vinculante, sobre a catalogación, descatalogación e cambio de categoría de ameaza das especies de fauna e flora de Galicia no Catálogo galego de especies ameazadas.
• Informar, con carácter facultativo e non vinculante, os plans de xestión de especies catalogadas e o seu desenvolvemento.
• Emitir ditames en materia de conservación e protección das especies.
• En xeral, subministrar información e prestar apoio e asesoramento en materia de conservación da variedade da vida en Galicia.
• Por solicitude da persoa titular da dirección xeral competente en materia de conservación da natureza, calquera outra función relacionada coa conservación e fomento da biodiversidade en Galicia.

Composición

O OGB é un órgano colexiado constituído por:

• Presidente/a: directora xeral de Conservación da Natureza.
• Vicepresidente/a: un/unha representante da Consellería competente en materia de ambiente, que será designado/a pola presidencia.
• Secretario/a.
• Vogais:
• Dous/dúas representantes da dirección xeral competente en materia de conservación da biodiversidade.
• Un/unha representante do departamento competente na xestión da Rede de Observación do Territorio da dirección xeral competente en materia de desenvolvemento sostible.
• Un/unha representante por cada unha das universidades galegas, que serán libremente designados/as por estas.
• Catro especialistas de recoñecido prestixio no estudo e na investigación de especies de vertebrados, invertebrados, fanerógamas e criptógamas respectivamente, designados pola dirección xeral competente en materia de conservación da biodiversidade.
• Un/unha especialista de recoñecido prestixio no estudo e na investigación de especies do medio mariño, un/unha especialista de recoñecido prestixio no estudo e investigación de especies do medio doceacuícola e un/unha especialista de recoñecido prestixio no estudo e na investigación de especies do medio terrestre, só no suposto de que ningún dos demais vogais indicados no punto 3 deste artigo posúa coñecementos especializados nalgunha destas materias. Os/as especialistas sinalados neste punto serán designados, se for preciso, pola dirección xeral competente en materia de conservación da natureza
• Dúas persoas en representación das asociacións inscritas no rexistro da Consellería de Medio Ambiente e Desenvolvemento Sostible que teñan entre os seus fins a conservación da biodiversidade en Galicia, que serán designadas por estas.

Funcionamento

• O Observatorio Galego da Biodiversidade reunirase en sesión ordinaria como mínimo unha vez ao ano. Poderá tamén reunirse en sesión extraordinaria cando a presidencia do OGB o estime oportuno.
• As convocatorias das sesións do OGB serán acordadas polo/a seu/súa presidente/a e efectuaranse con sete días de antelación naquel que vaia ter lugar a reunión. No caso de urxencia, as convocatorias das sesións extraordinarias poderán efectuarse cunha antelación mínima de corenta e oito horas.
• O OGB poderá crear no seu seo comisións ou grupos de traballo que abordarán o estudo e a preparación de temas específicos de interese para este órgano. Poderán ser convidadas a participar nas comisións ou grupos de traballo as persoas con coñecementos especializados nas materias que estean directamente relacionadas cos temas que sexan obxecto de estudo e debate desa comisión ou grupo de traballo.
• A Dirección Xeral competente en materia de conservación da biodiversidade prestaralle ao OGB todo o apoio técnico, material e persoal que este precise para o desempeño das súas funcións.

Réxime xurídico

Seralle de aplicación ao OGB o réxime xurídico dos órganos colexiados recollido no capítulo II, do título II, da Lei 30/1992, do 26 de novembro, de réxime xurídico das administracións públicas e do procedemento administrativo común, en todo aquilo que non estea especificamente regulado no decreto de fundación.

Véxase tamén

Outros artigos

• Árbores senlleiras de Galicia
• Flora de Galicia
• Fauna de Galicia