Locución
Unha locución é, en gramática, o grupo estable de dúas ou máis palabras que funciona como unha unidade léxica con significado de seu, non derivado do literal das palabras que o forman. Segundo a Gramática da lingua galega de Rosario Álvarez e Xosé Xove, "cando os adverbios, preposicións e conxuncións constan de máis dunha palabra e ó mesmo tempo se escriben separadamente denomínanse habitualmente locucións".[1]
Características editar
As locucións son construcións sintácticas usadas frecuentemente que presentan como principal característica que o seu significado non se deriva composicionalmente do significado literal das palabras que o forman, senón que é necesario coñecer o sentido xeral da locución. A existencia das locucións demostra que o significado ten compoñentes non estritamente literais.
Desde o punto de vista psicolingüístico, para determinar como o cerebro humano procesa estas expresións existen diversas teorías que adoitan agruparse en tres grupos principais. As non composicionais, que consideran ás locucións palabras longas; as composicionais, que suxiren no seu procesamento a intervención de elementos propios da literalidade, como o recoñecemento de palabras e a análise sintáctica; e as híbridas, que agrupan nocións das dous anteriores.[2]
Distínguense varios tipos segundo o seu funcionamento gramatical:
- Locución adverbial. Equivale a un adverbio e funciona como tal, polo xeral compostas por unha preposición e un substantivo, un adxectivo, un infinitivo, un participio ou un adverbio.[3]
- Locución conxuntiva. Funciona como conxunción.[4]
- Locución preposicional. Funciona como e substitúe a unha preposición.[5]
Notas editar
- ↑ Álvarez & Xove 2002, p. 231.
- ↑ Crespo & Góngora 2012.
- ↑ Freixeiro Mato 2002, p. 494.
- ↑ Freixeiro Mato 2002, p. 544.
- ↑ Freixeiro Mato 2002, p. 579.
Véxase tamén editar
Outros artigos editar
Bibliografía editar
- Álvarez, Rosario; Xove, Xosé (2002). Gramática da lingua galega. Galaxia.
- Crespo, Nina; Góngora, Begoña (nov. 2012). "¿Cómo se procesan las locuciones? Un debate desde la psicolingüística" 45 (80). Valparaíso: PUCV: 257–279. ISSN 0718-0934. doi:10.4067/S0718-09342012000300002.
- Freixeiro Mato, Xosé Ramón (2002). Gramática da lingua galega II. Morfosintaxe. A Nosa Terra.