Gemini 4
Gemini 4 foi a segunda misión tripulada do programa Gemini. A tripulación estaba formada por James A. McDivitt e Ed White, sendo a tripulación de apoio Frank Borman e James Lovell.[2][6]
| Gemini 4 | |
|---|---|
 Insignia da misión Gemini 4 | |
| Tipo | Tripulado |
| Organización | NASA |
| Destino actual | Reentrado na atmosfera.[1] |
| Data de lanzamento | 3 de xuño de 1965, 15:15:59.562 UTC[1][2][3][4] |
| Foguete portador | Titan II GLV[2][5] |
| Sitio de lanzamento | Centro Espacial de Cabo Cañaveral, rampla LC-19[2] |
| Duración da misión | 4,08 días (97 horas, 56 minutos e 12 segundos)[2][6] |
| Obxectivo da misión | Experimentos e prácticas de manobras con nave tripulada.[2] |
| Decaemento | 7 de xuño de 1965[1] |
| NSSDC ID | 1965-043A |
| Masa | 3574,0 kg[2][6] |
Desenvolvemento da misión editar
Gemini 4 foi a segunda misión tripulada do programa Gemini e durante a cal tivo lugar o primeiro paseo espacial dun estadounidense. Os obxectivos da misión, a parte de realizar a camiñada espacial, foron demostrar a capacidade das cápsulas Gemini e adquirir experiencia na xestión de voos espaciais de longa duración. Como obxectivos secundarios atopábanse facer manobras de cita espacial, a realización de once experimentos, avaliar os sistemas da cápsula, demostrar a capacidade para facer diversas manobras e o uso do sistema de manobra orbital como apoio do sistema de reentrada.[2][6]
Gemini 4 foi lanzada o 3 de xuño de 1965 ás 15:15:59,562 UTC (10:15:59 EST) desde o Complexo 19 de Cabo Cañaveral e insertada nunha órbita inicial de 162,3 km de perixeo e 282,1 km de apoxeo. Durante a primeira órbita manobrouse para aumentala a unha de 166 x 290 km e intentar unha cita espacial coa segunda etapa do Foguete espacial1foguete lanzador. A manobra de cita orbital cancelouse ao principio da segunda órbita tras comprobarse que se usara o 42% do propelente dispoñible, comprometendo o resto de obxectivos da misión. Tras a cancelación tivo lugar o comezo da primeira camiñada espacial levada a cabo por un estadounidense. Ed White presurizou o seu traxe espacial e despresurizou a cabina ás 14:33:35 EST, abrindo o zapón da cápsula ás 14:34. O astronauta saíu dous minutos máis tarde levando consigo unha pistola de gas para manobrar no baleiro e atado cun cable de 8 metros de lonxitude. O gas da pistola acabouse en tres minutos, co que White uso o cable e movementos do seu corpo para manobrar arredor da nave. O paseo durou 23 minutos, despois dos cales White volveu á cabina. Tras entrar, os astronautas atoparon dificultades para pechar o zapón, que só conseguiron pechar ás 15:10 EST tras traballar conxuntamente, represurizando a cabina ás 15:12:50.[2][6]
Para aforrar propelente, durante as seguintes 30 horas os astronautas non usaron o sistema de propulsión. Durante a órbita 48 un problema co ordenador de a bordo fixo imposible a reentrada atmosférica controlada por ordenador que fora planeada. No seu lugar, durante a órbita 62 e ás 11:56:00 EST, iniciouse o disparo dos retrofoguetes para unha reentrada balística, sen o uso da capacidade sustentadora da cápsula. A Gemini 4 amarou ás 12:12:11 EST no Atlántico occidental, a 27,73° N e 74,18° O, a 81 km do punto de amaraxe previsto. O tempo total de misión foi de 97 horas, 56 minutos e 12 segundos. A tripulación foi recollida por un helicóptero e levados ó U.S.S. Wasp ás 13:09. A cápsula foi recuperada ás 14:28.[2][6]
Notas editar
- ↑ 1,0 1,1 1,2 N2YO (2011). Real Time Satellite Tracking, ed. "GEMINI 4" (en inglés). Consultado o 17 de febreiro de 2013.
- ↑ 2,00 2,01 2,02 2,03 2,04 2,05 2,06 2,07 2,08 2,09 NASA (14 de maio de 2012). "Gemini 4" (en inglés). Consultado o 17 de febreiro de 2013.
- ↑ "Letter dated 5 August 1965 from the Deputy Permanent Representative of the United States of America addressed to the Secretary-General" (PDF) (65-19266). 11 de agosto de 1965: 2. Consultado o 23 de marzo de 2020.
- ↑ Claude Lafleur (2010). "Gemini 4" (en inglés). Consultado o 17 de febreiro de 2013.
- ↑ Gunter Dirk Krebs (2011). Gunter's Space Page, ed. "Gemini 2, 3, 4, 5, 6, 7, 8, 9, 10, 11, 12" (en inglés). Consultado o 17 de febreiro de 2013.
- ↑ 6,0 6,1 6,2 6,3 6,4 6,5 Mark Wade (2011). "Gemini 4" (en inglés). Consultado o 17 de febreiro de 2013.
Véxase tamén editar
| Wikimedia Commons ten máis contidos multimedia na categoría: Gemini 4 |