Wikipedia

Estación de radio militar de Pierre-sur-Haute

estación militar de Francia

A estación de radio militar de Pierre-sur-Haute é un complexo de 30 hectáreas (0,3 quilómetros cadrados) utilizado para as comunicacións das Forzas Armadas de Francia. No mesmo lugar sitúase tamén un repetidor de uso civil operado pola Télédiffusion de France[1] e un radar da Dirección Xeral da Aviación Civil de Francia. Administrativamente os terreos repártense entre as comunas de Sauvain e Job, na fronteira rexional que separa Ródano-Alpes de Auvernia.

Pierre-sur-Haute
A estación de radio militar de Pierre-sur-Haute. Obsérvanse as dúas torres de uso militar, no centro o repetidor da Télédiffusion de France, os barracóns militares e o heliporto
Data de Construción:1961
País: Francia
Efectivos:uns 20
Mapa da localización
FLYZ en Francia
FLYZ
FLYZ
Localización da estación militar de radio de Pierre-sur-Haute en Francia.

Historia editar

 
Telégrafo óptico de 1913.
 
A mesma estación construída en 1920.

En 1913 construíuse un telégrafo óptico nos terreos onde posteriormente se levantarían as instalacións militares. Na actualidade só se conserva un edificio histórico, en estado de ruína, aínda que mantén o semáforo na súa parte alta.[1]

En 1961, durante a guerra fría, a OTAN solicitou ao exército francés que construíse unha das súas estacións da rede de transmisións europeas en Europa, o coñecido sistema ACE High. Nesta rede de transmisións por microondas, a estación de Pierre-sur-Haute (cuxo código era FLYZ) debía actuar como repetidor entre as estacións de Lachens (FNIZ), no sur, e Mont-Août (FADZ), ao norte.[2][3] Empregáronse catro transmisores de 10 kW e dezaseis receptores. En 1974, a Forza Aérea Francesa tomou o control na xestión das instalacións. En 1988 a OTAN comezou o desmantelamento do sistema ACE High.

Uso editar

A estación de comunicacións de Pierre-sur-Haute está xestionada dende 1974 pola Forza Aérea Francesa, dependendo da Base Aérea de Lión – Mont Verdun, a 80 quilómetros de distancia. É unha das catro estacións de radio militares que se reparten de norte a sur en Francia, en constante comunicación coas outras tres: Lacaune, Henrichemont e a base aérea de Rochefort.[4] O propósito principal da estación de radio está relacionado coas transmisións de mando de unidades operacionais. As ordes á Force de Frappe, que opera as armas nucleares de Francia, deberían pasar por estas estacións repetidoras en caso de ser utilizadas.[1]

A estación de radio é parte do Commandement Air des Systèmes de Surveillance d'Information et de Communications (Comando Aéreo de Sistemas de Vixilancia de Información e de Comunicacións) desde a súa creación o 1 de xuño de 1994; e posteriormente tamén, desde o 1 de xaneiro de 2006, da Direction interarmées des réseaux d'infrastructure et des systèmes d'information (Dirección conxunta de infraestrutura de redes e sistemas de información).[4]

A estación militar está comandada por un major (suboficial de rango OR-9 no código OTAN). O persoal militar permanente componse duns 20 soldados, entre os que hai especialistas electricistas e mecánicos.[1]

Seguridade editar

O perímetro da estación de radio militar está rodeado por unha empalizada de madeira e aramado metálico. O persoal militar e empregados civís acceden ás instalacións mediante helicóptero ou a través dunha vía asfaltada de 4 quilómetros. Dita vía está pechada ao público.

Interese dos medios editar

En 2013 a estación militar de radio atraeu o interese dos medios despois de coñecerse que a Dirección Central da Información Interior (máis coñecida polas súas siglas en francés DCRI, Direction Centrale du Renseignement Intérieur), a axencia de intelixencia francesa, tentou suprimir o artigo da Wikipedia en francés que falaba sobre o complexo.

A Fundación Wikimedia preguntou á axencia de intelixencia que partes do artigo podían ser un problema de seguridade, indicando que o artigo só reflectía información libre dispoñible nun programa de televisión do canal Télévision Loire 7, unha televisión local.[5][6] O DCRI non accedeu a dar eses detalles e volveu repetir que se borrase o artigo. A Fundación Wikimedia negouse a borrar o artigo e o DCRI meteu presión a un administrador voluntario da Wikipedia en francés residente en Francia para que o fixese.[5][7] O administrador Remy Mathis, un empregado da Biblioteca nacional de Francia e presidente da asociación Wikimedia France, obedeceu.[8]

Despois, o artigo foi restaurado por outro editor de Wikipedia residente en Suíza.[9][10][11] Como resultado da controversia, o artigo converteuse na páxina máis lida da Wikipedia en francés,[12] con máis de 120.000 visitas na fin de semana do 6/7 de abril de 2013.[13] Xa foi traducido a moitos outros idiomas.[14]

Fonte: Wiki-FR[15] Wiki-EN[16] Wiki-IT[17] Wiki-ES[18] Wiki-DE[19]

Notas editar

  1. ↑ 1,0 1,1 1,2 1,3 Paul-Émile Liogier (2004). "A base militar de Chalmazel" (Documentary) (en francés). Télé Loire 7. Consultado o 5 de abril de 2013. [Ligazón morta]
  2. ↑ "Troposcatter Communication Networks". 30 de xuño de 2012. Consultado o 5 de abril de 2013. 
  3. ↑ "Dás ACE High System" (en alemán). acehighsystemeurope. 17 de febreiro de 2013. Arquivado dende o orixinal o 26 de maio de 2013. Consultado o 5 de abril de 2013. 
  4. ↑ 4,0 4,1 "Histoire succincte des "SSIC" (systèmes de surveillance, d'information et de communications) de l'armée de l'air". Association Nationale Air des Télécommunications et du Contrôle. 30 de xuño de 2012. Arquivado dende o orixinal o 31 de marzo de 2009. Consultado o 09 de abril de 2013. 
  5. ↑ 5,0 5,1 Willsher, Kim (7 April 2013). "French secret service accused of censorship over Wikipedia page". The Guardian. Consultado o 7 April 2013. 
  6. ↑ Poncet, Guerric (9 April 2013). "Wikipédia et DCRI : la chaîne locale "s'attend" à être censurée". Le Point (en French) (Paris). Consultado o 9 de abril de 2013. 
  7. ↑ Kleinz, Torsten (6 April 2013). "Französischer Geheimdienst verlangt Löschung eines Wikipedia-Artikels". Heise Online (en German). Heise. Consultado o 5 April 2013. 
  8. ↑ Willsher, Kim (7 April 2013). "French secret service accused of censorship over Wikipedia page". The Guardian. Consultado o 7 April 2013. 
  9. ↑ “French homeland intelligence threatens a volunteer sysop to delete a Wikipedia Article”, Wikimédia France Arquivado 20 de abril de 2013 en Wayback Machine., 6 April 2013, retrieved 6 April 2013
  10. ↑ "La DCRI accusée d'avoir illégalement forcé la suppression d'un article de Wikipédia". Le Monde. 6 April 2013. Consultado o 6 April 2013. 
  11. ↑ Koch, Simon (9 April 2013). "Une Suissesse empêche la censure de Wikipédia". Le Matin (en French) (Lausanne). Arquivado dende o orixinal o 09 de outubro de 2019. Consultado o 9 April 2013. 
  12. ↑ Geuss, Megan (6 April 2013). "Wikipedia editor allegedly forced by French intelligence to delete "classified" entry". Arstechnica. Consultado o 7 April 2013. 
  13. ↑ "Wikipedia article traffic statistics for 'Station hertzienne militaire de Pierre-sur-Haute'". stats.grok.se. Arquivado dende o orixinal o 14 de abril de 2013. Consultado o 11 de abril de 2013. 
  14. ↑ List of translations on Wikidata
  15. ↑ militaire de Pierre-sur-Haute
  16. ↑ military radio station
  17. ↑ militare di Pierre-sur-Haute
  18. ↑ de radio militar de Pierre-sur-Haute
  19. ↑ Funkstation Pierre-sur-Haute

Véxase tamén editar

Ligazóns externas editar

Coordenadas: 45°39′11″N 3°48′30″L / 45.653071, 3.808447

Traído desde «https://gl.wikipedia.org/w/index.php?title=Estación_de_radio_militar_de_Pierre-sur-Haute&oldid=6658208»