Desoxiuridina difosfato

A desoxiuridina difosfato ou difosfato de desoxiuridina, abreviado como dUDP, é un nucleótido que non forma parte dos ácidos nucleicos e que ten como misión intervir na biosíntese de nucleótidos. A molécula está formada polo azucre desoxirribosa enlazado coa base nitroxenada uracilo por enlace N-glicosídico entre o carbono 1' do azucre e o nitróxeno en posición 1 da base, e un grupo de dous fosfatos esterificado no carbono 5', os cales están unidos entre si por enlace anhidro.

Difosfato de desoxiuridina.

Os nucleótidos con uracilo teñen normalmente ribosa, polo que son ribonucleótidos, e o UMP é o nucleótido distintivo do ARN. Non obstante, o dUDP, aínda que pouco común, existe tamén na célula e a súa misión é intervir como intermediario da síntese do desoxirribonucleótido dTMP (ás veces chamado TMP). Tamén existe na mesma ruta metabólica o dUMP. As reaccións nas que están implicados son as seguintes :

• O UDP redúcese a dUDP por acción da ribonucleótido redutase con intervención da proteína transportadora de hidróxenos tiorredoxina.

UDP + tiorredoxina reducida → dUDP + tiorredoxina oxidada + H₂O

• O dUDP desfosforílase a dUMP por hidrólise:

dUDP + H₂O → dUMP + Pi

• O dUMP intervén agora na síntese do dTMP por metilación do seu uracilo por intermediación do N⁵N¹⁰-metilentetrahidrofolato en reacción catalizada pola timidilato sintetase.

dUMP + N⁵N¹⁰-metilentetrahidrofolato → dTMP + dihidrofolato

Véxase tamén

Outros artigos

• UDP
• Desoxiuridina monofosfato
• dTMP