Comité Consultivo Cidadán sobre a Moeda
O Comité Consultivo Cidadán sobre a Moeda (en inglés: Citizens Coinage Advisory Committee —CCAC—) é un órgano consultivo creado en 2003 no seo do Departamento do Tesouro dos Estados Unidos, para asesorar o seu secretario acerca das cuestións relativas á moeda.
| Comité Consultivo Cidadán sobre a Moeda | |
|---|---|
| –Citizens Coinage Advisory Committee– | |
| |
| Logotipo do Departamento do Tesouro dos EEUU | |
| Información xeral | |
| Formación | 23 de abril de 2003 |
| Precedentes | Citizens Commemorative Coin Advisory Committee (CCCAC) |
| Xurisdición | Estados Unidos |
| Sede central | 801 9th Street, NW Washington, D.C. 20220 Estados Unidos.
|
| Director | Lawrence Brown |
| Axencia sup. | Departamento do Tesouro |
| Sitio web | |
| www.ccac.gov | |
Este comité substitúe o anterior Comité Consultivo Cidadán sobre Moedas Conmemorativas (Citizens Commemorative Coin Advisory Committee —CCCAC—).
Lawrence Brown foi nomeado o 30 de xaneiro de 2022 como presidente do Comité.[1]
Creación editar
O Comité Consultivo Cidadán sobre a Moeda foi creado polo Congreso dos Estados Unidos en virtude da Lei Pública 108-15, do 23 de abril de 2003, coa finalidade de asesorar o secretario do Departamento do Tesouro acerca dos temas e dos deseños de todas as moedas e medallas oficiais emitidas nos Estados Unidos.[2][3]
Neste sentido, o Comité representa imparcialmente os intereses dos coleccionistas numismáticos e da cidadanía estadounidense.[3]
Funcións editar
Consonte a lei pola que se creou, ao Comité asígnanselle tres funcións principais:[2][4]
- Asesorar o secretario do Tesouro sobre os temas e os deseños tanto das moedas circulantes como das emitidas para o coleccionismo ou para o investimento en metais nobres, así como das medallas oficiais.
- Asesorar o secretario do Tesouro en relación cos acontecementos, as persoas e os lugares que deben conmemorarse nas moedas conmemorativas.
- Formular recomendacións con respecto ás tiraxes que deben ter as moedas conmemorativas recomendadas.
Logo de cada reunión do Comité, o secretario do Tesouro é informado mediante carta dos acordos tomados no encontro.[4] Ademais, o CCAC publica informes anuais destinados tanto ao secretario do Tesouro como á Comisión de Servizos Financeiros da Cámara de Representantes e á Comisión de Banca, Vivenda e Asuntos Urbanos do Senado.[5]
Composición editar
O Comité está composto por 11 membros nomeados polo secretario do Tesouro, que responden aos seguintes perfís:[2][6]
- Sete persoas son propostas directamente polo secretario do Tesouro:
- Unha persoa con recoñecemento nacional e internacional no ámbito numismático, pola súa formación e pola súa experiencia como conservador dunha colección numismática importante.
- Unha persoa experta no ámbito das medallas ou da escultura.
- Unha autoridade erudita na historia dos Estados Unidos.
- Unha persoa experta en numismática
- Tres persoas que representen os intereses da poboación xeral.
- Os catro membros restantes son nomeados por recomendación do presidente da Cámara de Representantes e do líder da maioría na mesma cámara, e polos líderes da maioría e da minoría do Senado.
Notas editar
- ↑ "Secretary of the Treasury Appoints Dr. Lawrence Brown to Chair Citizens Coinage Advisory Committee". United States Mint. 28 de xaneiro de 2022.
- ↑ 2,0 2,1 2,2 "Public Law 108-15 - APR. 23, 2003". Govinfo.gov
- ↑ 3,0 3,1 "Mission and Purpose of the CCAC". Citizens Coinage Advisory Committee.
- ↑ 4,0 4,1 "About Us". Citzens Coinage Advisory Committee.
- ↑ "CCAC Annual Reports". Citzens Coinage Advisory Committee.
- ↑ "Members". Citzens Coinage Advisory Committee.