A sombra cazadora
A sombra cazadora é unha novela de Suso de Toro. Foi publicada en 1994 por Edicións Xerais de Galicia. En edicións posteriores modificou o texto, ampliándoo en diferentes aspectos. No ano 2013 saíu do prelo a súa 18ª edición.
| A sombra cazadora | |
|---|---|
| Autor/a | Suso de Toro |
| Orixe |  Galicia |
| Lingua | Galego |
| Colección | Fóra de Xogo |
| Xénero(s) | Novela xuvenil |
| Editorial | Edicións Xerais de Galicia |
| Data de pub. | 1994 |
| Páxinas | 208 |
| ISBN | ISBN 84-7507-841-9 |
| [ editar datos en Wikidata ] | |
Trama editar
Dous irmáns, Clara e un rapaz do que non se saberá o nome ata as páxinas finais, viven co seu pai descoñecendo por completo o mundo exterior. Dous días antes da maioría de idade de Clara, o pai vainos preparando: ensínaos a conducir, entrégalles bonos para o autobús e explícalles a causa da súa reclusión. El fora un famoso presentador de televisión que, para evitar os estragos da idade, convencera a nai dos rapaces para crear por ordenador unha imaxe del, mais esta imaxe “rouboulle a mirada” e fíxose dona das pantallas; nese momento foi cando se pecharon nese terreo. Agora a imaxe descubriu a existencia dos fillos e quererá acabar con eles.
O día do aniversario o pai suicídase e eles deben saír ao mundo exterior nunha aventura que se converterá nunha viaxe de iniciación e ao mesmo tempo nunha fuxida da Imaxe.
Diríxense á casa do padriño, para o que son axudados polo Toco, mais axiña terán que fuxir á Zona de Sombra ao seren denunciados ante a Imaxe polo fillo do padriño. Alí será onde se saiba o nome do rapaz, o que lle servirá para vencer a Imaxe.
Narración editar
Este artigo precisa de máis fontes ou referencias que aparezan nunha publicación acreditada que poidan verificar o seu contido, como libros ou outras publicacións especializadas no tema. Por favor, axude mellorando este artigo. (Desde abril de 2017.) |
A obra, na súa primeira edición, está estruturada en catro partes de moi diferente extensión e un epílogo:
“Outro día no paraíso” (5 capítulos)
“Unha sombra no paraíso” (16 capítulos)
“A caverna e as sombras” (16 capítulos)
“Benvido á casa” (2 capítulos)
Todos os capítulos están narrados en primeira persoa, cunha focalización interna variable, alternando os puntos de vista dos dous irmáns (ademais dalgúns capítulos postos en boca do pai ou do Toco).
Personaxes editar
- Clara, a protagonista, moza de 18 anos que desde a morte da nai levou a casa na que vive recluída a familia e criou o seu irmán e que agora dirixirá os pasos dos dous pola cidade descoñecida.
- O irmán, de quen non sabemos o nome ata o final, comezou a tatexar á morte da nai e recupera a fala un día que escoita a nai chamándoo “fillo” mentres viven aínda na propiedade.
- O pai, culpábel do encerro da familia pola súa cobiza e que se suicida para salvar os fillos.
- O Toco, adolescente pai dunha nena, Estrela, que vive nas rúas e que os guiará polo subsolo ata a casa do padriño e posteriormente ata a Zona de Sombra.
- O padriño, que os agocha na súa casa e lles explica como chegar á Zona de Sombra.
Traducións editar
- Ao catalán por Pau Joan Hernàndez Fuenmayor como L'ombra caçadora, publicado en 2001 por Editorial Columna, na colección Columna jove[1].
Notas editar
- ↑ "Bitraga. Biblioteca de tradución galega". Arquivado dende o orixinal o 12 de outubro de 2017. Consultado o 2018-12-16.
- ↑ "Bitraga. Biblioteca de tradución galega". Arquivado dende o orixinal o 12 de outubro de 2017. Consultado o 2018-12-16.
- ↑ "Bitraga. Biblioteca de tradución galega". Arquivado dende o orixinal o 12 de outubro de 2017. Consultado o 2018-12-16.
- ↑ "Bitraga. Biblioteca de tradución galega". Arquivado dende o orixinal o 12 de outubro de 2017. Consultado o 2018-12-19.
Véxase tamén editar
Bibliografía editar
- Costas, Concha: Fóra de Xogo. Tecendo lecturas Larousse. Catálogos.