Tesouro de Valsadornín
| Tesouro de Valsadornín | |
|---|---|
 | |
| · Data do depósito: século III d.C. (ca. 270).
· Período: baixo Imperio Romano. · País: España. · Descubridor: Tomás y Eusebia Roldán. · Lugar de aparición: Valsadornín, Palencia. · Data do achado: 1937. · Composición: ca. 45 quilos de moedas romanas. · Conservación: Museo de Palencia. |
O tesouro de Valsadornín é un conxunto de moedas da Antiga Roma achado en 1937 nas proximidades da entidade local de Valsadornín, Cervera de Pisuerga, na provincia española de Palencia.
O soterramento data de arredor do ano 270 e o depósito está composto por un recipiente que contiña arredor de 45 quilogramos de moedas, maioritariamente de bronce e algunhas de prata.
O achado
editarO tesouro foi achado de xeito casual o 19 de agosto de 1937 polos irmáns Eusebia e Tomás Roldán, cando percorrían o camiño que unía Valsadornín con Gramedo, localidade da que eran veciños. En medio dunha forte treboada, cando atravesaban o lugar de Valdiquecho, en Santa Águeda, tropezaron cos restos dun recipiente que asomaba do chan cunha gran cantidade de moedas. Os irmáns recolleron o tesouro e trasladárono á súa casa, onde comprobaron que o recipiente era unha especie de pota metálica cun conglomerado de moedas oxidadas no seu interior. O conxunto pesaba 45 kg.[1]
As autoridades arqueolóxicas palentinas procederon a inspeccionar o lugar na procura doutros posibles restos, aínda que sen resultado. Daquela, o tesouro trasladouse ao Museo de Palencia, mais non chegou completo, xa que os propios irmáns Roldán, así como veciños de Cervera de Pisuerga,[2] o gobernador civil de Valladolid Juan Alonso-Villalobos Solórzano e o departamento de Arqueoloxía da Universidade de Valladolid quedaron con parte das moedas. No Museo de Palencia permaneceu íntegro ata 1951, cando se trasladou a parte amalgamada do tesouro ao Museo Arqueolóxico Nacional, en Madrid.[3]
Contido
editarEn 1979 realizouse o primeiro estudo da parte que ficou en Palencia. Entre as moedas do tesouro, os emperadores romanos que apareceron representados son Galieno, Claudio II e Salonina, aínda que en total hai dezaoito gobernantes representados.[4] O total das moedas que quedaron en Palencia era de 2.421 exemplares, que pesaban 6,2 kg e supuñan o 14 % das pezas do achadoo total.[5] O exame destas moedas permitiu fixar a data de soterramento do tesouro non antes de 270 e o seu dono seguramente o agochou por mor da inestabilidade interna da época.[6] Estimouse que inicialmente o conxunto puido ter entre dez mil e once mil pezas.[7]
A parte do conxunto que se trasladou en Madrid ficou en depósito no Museo Arqueolóxico Nacional durante décadas, á espera para ser restaurada. Finalmente, entre 2016 e 2018 o Instituto do Patrimonio Cultural de España procedeu á súa restauración e, logo de ser exposto no propio MAN, o conxunto daa pota mais arredor de 8.000 moedas restauradas foi entregado novamente ao Museo de Palencia en xaneiro de 2019 para a súa exposición completa.[4][8][9]
Notas
editar- ↑ Calleja González, M. V. (1979). Páxina 7.
- ↑ Berrueta, J. (2020). "El drama del tesoro romano hallado en plena Guerra Civil en Palencia y expoliado por sus vecinos". En El Español. 23 de xullo.
- ↑ Calleja González, M. V. (1979). Páxina 9.
- ↑ 4,0 4,1 Olaya, V. G. (2018). "El tesoro romano que apareció en un caldero". En El País. 4 dedecembro.
- ↑ Calleja González, M. V. (1979). Páxina 13.
- ↑ Calleja González, M. V. (1979). Páxina 15.
- ↑ Calleja González, M. V. (1979). Páxina 16.
- ↑ "El misterio de las 11.000 monedas romanas en una olla". En Última Hora. 11 de outubro de 2020.
- ↑ Otero Morán, P. (2020).
Véxase tamén
editarBibliografía
editar- Calleja González, M. V. (1979). "El tesoro romano de Valsadornín". En Publicaciones de la Institución Tello Téllez de Meneses. Nº 42. Páxinas 5-25.
- Otero Morán, P. (2020). "Vitrina CERO. El Tesoro de Valsadornín". En Boletín del Museo Arqueológico Nacional. Nº 38. Páxinas 363-374.