Proxecto Adam
O proxecto Adam foi unha misión proposta por Wernher von Braun a principios de 1958 para enviar ao primeiro home ao espazo nunha misión suborbital a bordo dunha cápsula lanzada mediante un foguete Redstone. O proxecto foi desestimado e tildado de "espectáculo" a favor do proxecto Mercury.[1]
Historia
editarTralo éxito da posta en órbita do primeiro satélite artificial estadounidense, o Explorer I, a bordo dun foguete Juno, derivado do foguete Redstone, Wernher von Braun propuxo o proxecto Adam para enviar ó espazo ao primeiro astronauta cara finais de 1959 a un relativamente modesto custo de 12 millóns de dólares e competindo coa proposta Main In Space Soonest (MISS) da Forza Aérea, que tiña un custo de 100 millóns de dólares. O nome orixinal do proxecto foi Man Very High, e a proposta consistía no uso dun foguete Redstone para enviar un home a bordo dunha cápsula desde Cabo Cañaveral nunha traxectoria suborbital a unha altura de 240 km. O astronauta experimentaría seis minutos de ingravidez e amararía a 250 km de distancia, sendo recollido por efectivos da Armada. O proxecto foi rexeitado en abril de 1958 por ser visto como unha ameaza para o proxecto MISS, e enviado por von Braun á axencia ARPA (hoxe DARPA o 13 de maio de 1958 como un proxecto exclusivamente do Exército, coa Armada proporcionando unicamente o servizo de recuperación da cápsula. O proxecto foi aceptado pero subvencionado con só 4,75 millóns de dólares.[1]
A NACA tamén desaprobou o proxecto ata o punto de que o administrador asociado Hugh Dryden declarou no congreso que
tossing a man up in the air and letting him come back . . . is about the same technical value as the circus stunt of shooting a young lady from a cannon. . . .
que pode traducirse como
lanzar a un home e deixar que volva a caer... ten o mesmo valor técnico que o espectáculo circense de lanzar a unha rapaza mediante un canón...
O 11 de xullo de 1958, Roy W. Johnson, xefe de ARPA, sinaloulle ó Exército que o proxecto Adam non era considerador práctico para o voo espacial tripulado. O Exército deixou de apoiar o proxecto, quedando a CIA interesada nel como a "demostración psicolóxica" que necesitaban os Estados Unidos na carreira espacial. Porén, Donald A. Quarles, adxunto ó Secretario de Defensa, replicou que de tódolos xeitos habería que esperar a facer máis estudos, dada a recente creación da NASA e a incerteza sobre quén levaría a cabo a dirección dos voos espaciais.[1]
Trala creación da NASA, Dryden deixou de considerar o proxecto Adam como un "espectáculo circense" e os voos suborbitais pasaron a formar parte do proxecto Mercury, cun atraso que permitiu que a Unión Soviética puxera o primeiro home no espazo, Iuri Gagarin.