Moeda-nariz de formiga

As moedas-nariz de formiga (en chinés: 蚁鼻钱; pinyin: yǐ bí qián, "moeda como o nariz dunha formiga"), coñecidas tamén como moedas yi-bi, eran unhas pequenas moedas chinesas fundidas en bronce e emitidas no Estado de Chu durante o período dos Reinos Combatentes (475-221 a. de C.).

Moedas-nariz de formiga achadas en Xiaogan, provincia de Hubei (Museo Provincial de Hubei).

En lingua chinesa coñécense tamén como 鬼脸钱 (guǐ liǎn qián; "moeda coa cara do diaño").

Tipoloxía

Anverso dunha moeda-nariz de formiga

Molde para a fundición de moedas-nariz de formiga (Museo de Shanghai)

Estas moedas parecen ser, pola súa forma ovalada, unha evolución das moedas-cuncha. Teñen habitualmente entre 14 e 18 milímetros de altura e entre 5 e 7 de ancho, e pesan arredor de 3 gramos. Nos seus anversos amosan unha inscrición arcaica e no extremo inferior presentan un pequeno furado (frecuentemente non completo), en tanto que os seus reversos son planos.

Canto ás inscricións, coñécense oito variantes, das que só catro foron descifradas e as outras catro son obxecto de debate entre os investigadores.

A denominación de "moeda-nariz de formiga" foilles dada polos seus descubridores, que nalgúns casos tamén as denominaron como "moedas-cara de fantasma", baseándose na confusa aparencia das moedas. Porén, o que as fai semellar unha cara de formiga (sobre todo no modelo máis común) é realmente a lenda arcaica de gran tamaño, o que se ve favorecido ademais polo furado inferior, que lembra unha boca.

En 1963 houbo un achado duns 5.000 exemplares nun lago en Xiaogan, Hubei, cun peso medio de 4,37 gramos.

Véxase tamén

Bibliografía

• Walker, T. "The Oft-Misunderstood Ant-Nose Coinageof Ancient China". Coincomunity.com

Outros artigos

• Formas das moedas