Luís Monteagudo
Luís Monteagudo García, nado na Coruña o 20 de novembro de 1919 e finado en Santiago de Compostela o 14 de febreiro de 2018,[1] foi un arqueólogo director do Museo Arqueolóxico da Coruña, membro do Deutsches Archäologisches Institut de Berlín, colaborador de Prähistorische Bronzefunde e correspondente da Real Academia da Historia e da Real Academia Galega.
| Luís Monteagudo | |
|---|---|
| Nacemento | 20 de novembro de 1919 |
| Lugar de nacemento | A Coruña |
| Falecemento | 14 de febreiro de 2018 |
| Lugar de falecemento | Santiago de Compostela |
| Nacionalidade | España |
| Alma máter | Universidade de Santiago de Compostela e Universidade de Madrid |
| Ocupación | arqueólogo |
| Na rede | |
 | |
| [ editar datos en Wikidata ] | |
TraxectoriaEditar
Fixo o bacharelato no Instituto da Coruña. En 1935, con 15 anos, ía coa asociación Los Amantes del Campo promovida por Manuel Insua Santos, precedente das actuais asociacións interesadas na arqueoloxía e dedicada a realizar traballos de arqueoloxía, escavando sitios arqueolóxicos e documentando os traballos. En agosto de 1937 comezou a traballar como carteiro auxiliar e despois brigada postal no Servizo de Correos. Foi alistado en 1938 e marchou á fronte. Foi ferido dúas veces na Guerra Civil, unha cun anaco de metralla na cabeza e outra cun tiro da 11 División de Líster.[2] Como mutilado de guerra volveu incorporarse ao Servizo de Correos de abril de 1939 a decembro de 1940.
Licenciouse en Filosofía e Letras na Universidade de Santiago de Compostela en 1941, e doutorouse na Universidade de Madrid en 1949 coa tese Prehistoria del NW de España. Galicia en Ptolomeo. Foi profesor na Universidade de Santiago de Compostela desde onde promoveu a primeira campaña de escavacións no Castro de Elviña en 1947, das que foi apartado por motivos políticos. Percorreu Galiza documentando achados e dirixindo escavacións. Percorreu en bicicleta Europa visitando museos e coleccións. Foi director do Museo de Ávila e posteriormente foi nomeado director do Museo Arqueolóxico e Histórico da Coruña, onde formou a moitos arqueólogos que continuaron o seu labor. En 1975 foi apartado do posto pola súa defensa a morte do Museo e o Patrimonio Arqueolóxico e enviado en comisión de servizos forzosa ao Museo das Peregrinacións de Santiago de Compostela onde se xubilou. En calquera caso el sempre se considerou "Director do Museo Arqueolóxico e Histórico da Coruña por oposición, non por dixitación" segundo asinou algúns dos seus escritos.[3] Finou en Santiago de Compostela o 14 de febreiro de 2018.[4],
ObrasEditar
- Die Beile der Iberischen Halbinsel, Machados de bronce da Península Ibérica.
- Hachas de talón, 1951.
- Nombres de túmulos y dólmenes en Galicia y Portugal, 1954.
- Hispania Germánica, 1966.
- Hacha de tope tipo Senra A, 1975.
- La religiosidad callaica. Estela funeraria romana de Mazarelas (Oza dos Ríos, A Coruña), cultos astrales, prisciliano y outeiros. Anuario Brigantino, nº 19, 1996, pp 11-118.
NotasEditar
- ↑ Redacción (14 de febreiro de 2018). "Morre Luis Monteagudo, o arqueólogo rebelde que loitou na Guerra Civil e percorreu Europa en bicicleta". historiadegalicia.gal. Consultado o 27 de maio de 2023.
- ↑ Monteagudo, Luís (1991). "Necrópolis de mámoas de A Zapateira (A Coruña)" (PDF). Anuario Brigantino (en castelán) (14): 11–32. Consultado o 19 de agosto de 2013.
- ↑ Asociación Profesional de Arqueólogos de Galicia (20 de decembro de 1996). "Datos biográficos de Luís Monteagudo". Homenaxe ao Dr. D. Luís Monteagudo. Consultado o 19 de agosto de 2013.
- ↑ "Morre o arqueólogo Luís Monteagudo", artigo en Cultura Galega, 14 de febreiro de 2018.
Véxase taménEditar
BibliografíaEditar
- "Monteagudo García, Luís". Dicionario biográfico de Galicia 2. Ir Indo Edicións. 2010-2011. p. 313.
- "Monteagudo García, Luis". Gran Enciclopedia Galega Silverio Cañada (DVD). El Progreso. 2005. ISBN 84-87804-88-8.
Outros artigosEditar
Ligazóns externasEditar
- Biografía na Fundación Luis Monteagudo.
- Luis Monteagudo García no Museo Arqueológico Nacional.