Lockheed Martin F-22 Raptor

O F-22 Raptor é un avión de combate de alta manobrabilidade de quinta xeración con tecnoloxía de sixilo construído por Lockheed Martin Aeronautics e Boeing Defense, Space & Security. Foi deseñado como caza de superioridade aérea da Forza Aérea dos Estados Unidos (USAF), pero pode levar a cabo máis tipos de misións, tales como ataque a terra ou guerra electrónica. O primeiro prototipo (YF-22) voou por vez primeira o 29 de setembro de 1990.

F-22 Raptor
Dous F-22 Raptor en voo
Tipo	caza
Fabricante	Boeing e Lockheed Martin
Primeiro voo	29 de setembro de 1990
Introducido	15 de decembro do 2005
Estado	en servizo
Produción	1997-2011
Unidades construídas	195 (8 de probas e 187 operacionais)

Lockheed Martin é o contratista principal e o responsable da maior parte da estrutura, do sistema de armas e da ensamblaxe final do F-22. O socio do programa é Boeing Integrated Defense Systems e proporciona as ás, a parte traseira da fuselaxe, a integración de aviónica e todos os sistemas de adestramento dos pilotos e do persoal de mantemento.

O avión foi designado tanto F-22 como F/A-22 durante os anos anteriores á súa entrada en servizo na Forza Aérea dos Estados Unidos en decembro de 2005 como F-22A. A pesar dun período de desenvolvemento prolongado e custoso, a USAF considera o F-22 como un compoñente fundamental no futuro poder aéreo táctico do seu país, e afirma que o avión non é comparable con ningún caza coñecido nin proxectado, mentres que Lockheed Martin reivindica que a combinación de furtividade, velocidade, axilidade, precisión e conciencia situacional do Raptor, combinadas coas súas capacidades de combate aire-aire e aire-superficie, deberían facer del un dos mellores cazas do mundo actualmente.

Con todo, a verdade é que o raptor ten uns custos altos de mantemento e unha serie de problemas técnicos importantes (coma corrosión en partes da fuselaxe, problemas na computadora de a bordo etc.) e de mantemento, polo cal en 2009 se votou no senado dos EEUU parar a construción de máis F-22.