Leaky scanning
O leaky scanning (que se pode traducir non literalmente como 'escaneo con fugas' ou 'escape do escaneo') é un mecanismo usado ás veces durante a fase de iniciación da tradución de proteínas eucariota que permite a regulación da expresión xénica. Durante a iniciación da tradución, a subunidade ribosómica pequena de 40S eucariota (en forma dun complexo de preiniciación de 43S ou 43S PIC) "escanea", "rastrexa" ou móvese en dirección 5' → 3' ao longo da rexión non traducida 5' (5'UTR) para localizar o codón de iniciación (AUG) para comezar a fase de elongación da tradución. Non obstante, ás veces o ribosoma que está escaneando salta o codón de iniciación AUG normal pasando de longo e empeza a tradución máis adiante, augas abaixo noutro codón AUG que encontra, que debía codificar unha metionina do interior da proteína, pero que é usado como novo codón de iniciación, polo que a proteína vai quedar máis pequena do habitual, sen a parte inicial normal.[1] Coa maioría dos mecanismos de escaneo que usa o ribosoma, a tradución en células eucariotas ocorre no codón de iniciación AUG máis próximo ao extremo 5' do ARNm; porén, se o ribosoma que está escaneando encontra un “contexto nucleotídico desfavorable” arredor do codón de iniciación, continúa escaneando sen iniciar a tradución alí.[2]
Non sempre a iniciación da tradución por este mecanismo ocorre en codóns AUG situados máis adiante do normal. Hai certos casos nos que se atopou que a iniciación ocorría augas arriba nun codón que non era AUG. En xenes eucariotas que conteñen secuencias líder ricas en G-C obsérvase con frecuencia este mecanismo. Hipotetízase que o escaneo faise máis lento debido a unha estrutura secundaria que permite a unión do ARNt-Met cun codón incorrecto.[3]
Varios virus usan o mecanismo do leaky scanning para producir proteínas fundamentais, o que implica que este procedemento non é unha consecuencia dunha deficiencia ou erro, senón, ao contrario, permite aos virus superar as altas presións selectivas de ter que competir cos seus hóspedes.[4] Os biólogos moleculares están buscando cal é o ambiente nucleotídico ideal para a iniciación da tradución e o mecanismo polo cal os virus se replican.[1]
Descubrimento editar
Por medio de varios estudos Marilyn Kozak foi a primeira en recoñecer o papel esencial que ten o escaneado durante a iniciación da tradución en células de mamíferos. O codón AUG en mamíferos é recoñecido optimamente se está no contexto GCCRCCAUGG, tamén coñecido como secuencia consenso de Kozak.[5] A purina (R) e cada un dos nucleótidos dentro desta secuencia están altamente conservados e teñen unha importante función no recoñecemento e iniciación da tradución en moitas subunidades ribosómicas de 40S. Co contexto óptimo arredor do codón de iniciación AUG, os ribosomas empezan a iniciación nese punto. Un contexto débil dáse cando as secuencias adxacentes ao codón de iniciación AUG se desvían da secuencia consenso. Uns poucos ribosomas iniciarán a tradución nunha destas localizacións débiles, mais a maioría realizará aquí un leaky scanning, pasando de longo o codón, e iniciarana augas abaixo. Como consecuencia, é probable que se produzan proteínas diferentes.[3]
Notas editar
- ↑ 1,0 1,1 Kozak, Marilyn. “Initiation of Translation in prokaryotes and eukaryotes.” Gene 234 (1999): 187-208. Academic Search Complete. Web. 10 de xuño de 2014.
- ↑ Herzog, Etienne., et al. “Translation of the Second Gene of Peanut Clump Virus RNA 2 Occurs by Leaky Scanning In Vitro.” Virology 208. (1995): 215-225. Academic Search Complete. Web. 10 de xuño de 2014.
- ↑ 3,0 3,1 Kozak, Marilyn. “Pushing the limits of the scanning mechanism of initiation of translation.” Gene 299 (2002): 1-34. Academic Search Complete. Web. 11 June 2014.
- ↑ Ryaboba, Lyubov., et al. “Translation reinitiation and leaky scanning in plant viruses.” Virus Research 119 (2006): 52-62 Academic Search Complete. Web. 23 de xuño de 2014.
- ↑ Hinnebusch, Alan., “Molecular Mechanism of Scanning and Start Codon Selection in Eukaryotes.” American Society for Microbiology Vol. 75 no. 3. (2011): 434-467. Web. 11 de xuño de 2014.
Véxase tamén editar
Outros artigos editar
- Tradución de proteínas
- Rexión non traducida 5'
- uORF (marco aberto de lectura de augas arriba)