Juan Manuel Paz Novoa

Juan Manuel Paz Novoa, nado en Ourense o 4 de maio de 1839 e finado na mesma cidade o 26 de setembro de 1895, foi un avogado, xornalista e político galego.

Juan Manuel Paz Novoa

Biografía
Nacemento	4 de maio de 1839 Ourense, España
Morte	26 de setembro de 1895 (56 anos) Ourense, España
Lugar de sepultura	Cemiterio de San Francisco de Ourense
Gobernador civil da provincia de Pontevedra
Deputado no Congreso dos Deputados
Datos persoais
Educación	Universidade de Santiago de Compostela
Actividade
Ocupación	xornalista, político, xurista
Descrito pola fonte	Ensayo de un catálogo de periodistas españoles del siglo XIX (1903-1904), (sec:Paz Novoa (Juan Manuel), p.334)

Traxectoria

Álbum de la Caridad. Juegos Florales de La Coruña en 1861.

Acadou o grao de bacharel en Filosofía, Dereito Civil e Canónico e licenciouse en Dereito na Universidade de Santiago de Compostela, doutorándose máis tarde na Universidade Central de Madrid. Foi profesor de ensino medio en Bilbao, onde impartiu as materias de Economía Política e Dereito Mercantil. Conseguiu despois a cátedra destas materias en Ourense e tamén deu clases na Escola de Comercio de Ribadeo e da Coruña. Na Coruña exerceu como avogado, defendendo a Manuel Curros Enríquez no xuízo seguido contra el trala publicación de Aires da miña terra.

Militou no Partido Republicano Federal, formou parte da Xunta revolucionaria de Ourense en 1868, e foi capitán da Milicia Fuerza Ciudadana. Foi deputado (1873-1874) e gobernador civil de Pontevedra (1893). Foi o máximo inspirador da Lei de Redención de Foros de 1873 e participou na confección do Código civil como representante de Galicia.

Fundou e dirixiu o periódico ourensán El Correo de Galicia en 1872 e colaborou en El Orensano, La Nueva Galicia, El Heraldo Gallego, El Derecho e La Tertulia. Escribiu poemas que foron recollidos no Álbum de la Caridad e no álbum literario La aldea de Casdemiro (1876).

Foi correspondente da Real Sociedade Económica de Amigos do País de Santiago e membro da Real Academia da Historia e da de Xurisprudencia e Lexislación.

Obras

• Cartilla constitucional para uso de los niños que concurren a las escuelas de instrución primaria, 1870.
• Los foros en Galicia. Apuntes sobre la actual organización de la propiedad territorial en estas cuatro provincias y necesidad de su reforma, 1872.

Véxase tamén

Bibliografía

• Narradores ocasionais do século XIX (Relato breve) (PDF). Santiago de Compostela: Centro Ramón Piñeiro. 2003. pp. 307–308. ISBN 84-453-3736-X. Consultado o 11 de novembro de 2013.