José Ruibal

José Ruibal Argibay, nado en Xeve (Pontevedra) en 1925 e finado en Buendía (Cuenca) o 16 de febreiro de 1999, foi un dramaturgo galego, ideólogo da chamada "xeración simbolista".

José Ruibal

Biografía
Nacemento	1925 Xeve, España
Morte	16 de febreiro de 1999 (73/74 anos) Buendía, España
Datos persoais
País de nacionalidade	España
Actividade
Ocupación	escritor , dramaturgo
Xénero artístico	Dramaturxia
Lingua	Lingua castelá
Familia
Nai	Aurora Argibay Iglesias
Irmáns	Mercedes Ruibal

Traxectoria

Fillo dun funcionario municipal de Pontevedra e da tamén pintora Yoya. É autor da primeira monografía sobre Laxeiro que se publicou en 1951 como o primeiro dos Cuadernos de Arte Gallego na Colección Benito Soto. Viviu no Uruguai durante os anos cincuenta, e parte da súa obra foi escrita na Arxentina e nos Estados Unidos, onde estivo exiliado durante os últimos anos da ditadura de Francisco Franco. Foi profesor da State University of New York e da Minnessota University, asesor artístico do Festival Calderón (Texas), impartiu seminarios sobre teatro en universidades alemás e foi profesor no Actor’s Studio de New York, que o nomeou membro de honra. Colaborou en periódicos de Madrid e Hispaoamérica con artigos de política internacional.

Pasou os cinco últimos anos de vida incapacitado para a actividade intelectual, primeiro nunha residencia de Nigrán e finalmente nun xeriátrico de Buendía (Cuenca), onde morreu. As súas cinzas foron esparexidas na ría de Vigo.

O seu teatro

Comezou a súa carreira literaria nos anos cincuenta con Los mendigos (1957), onde presenta a miseria e a especulación política que a produce mediante procedementos de desrealización que fan aparecer aos poderes sociais protagonistas como figuras animais: o militar (Perro) o civil (Asno), o eclesiástico (Cuervo).

A súa obra máis importante é El hombre y la mosca, brillante sátira do franquismo, en forma de metáfora política; o espazo é unha cúpula onde permanecen encerrados o Ditador e o seu Dobre e chegou a ser estreado en 1983, cando a súa mensaxe perdera boa parte da súa vixencia.

Ruibal define o seu teatro como "verbo en movimiento" e, aínda que o seu ton crítico e de denuncia política é constante e ingrediente esencial do seu teatro, sempre os reviste dun carácter simbólico e alegórico que amplía o seu referente de evocación.

Obras

Publicou en 1950 o poemario El dios de los precipicios na Colección Benito Soto.

Entre as súas obras teatrais destacan:

• La ciencia del birlibirloque, 1956.
• Los mendigos, 1957.
• El bacalao, 1960.
• El asno, 1962 (sobre a explotación colonialista).
• Su majestad la sota, 1966.
• El hombre y la mosca, 1968 (obra de simbolismo político).
• Los mutantes, 1968.
• El rabo, 1968.
• Los ojos, 1968.
• La secretaria, 1968.
• El padre, 1968.
• El superagente, 1968.
• El ascenso, 1968.
• El mono piadoso, 1969.
• El asno electrónico, 1969.
• La máquina de pedir, 1969.
• Currículum vitae, 1970.
• Teatro sobre teatro, 1975.
• Controles, 1976.
• El patio de Yocasta, 1987.
• Helena, 1989.
• Celestina, 1989.
• Otra vez los avestruces, 1991.

Vida persoal

É irmán de Mercedes Ruibal e Ángeles Ruibal.

Véxase tamén

Bibliografía

• "Ruibal Argibay, Xosé". Enciclopedia Galega Universal. Ir Indo. 1999-2002. ISBN 84-7680-288-9. 
• Javier Huerta, Emilio Peral, Héctor Urzaiz, Teatro español de la A a la Z. Madrid: Espasa, 2005, p. 626.

Ligazóns externas

• "José Ruibal estrena la sátira 'El hombre y la mosca'" (3/2/1983). El País (en castelán).
• Páxina web de Ángeles Ruibal, irmá, en Internet Archive (en castelán).