José Diego Álvarez

José Diego Álvarez Álvarez, coñecido como Diego no mundo do fútbol, nado en Monforte de Lemos o 21 de decembro de 1954, é un exfutbolista galego. Centrocampista internacional da Real Sociedad a finais da década de 1970 e principios dos anos 1980.

José Diego Álvarez

Biografía
Nacemento	21 de decembro de 1954 (69 anos) Monforte de Lemos, España
Altura	179 cm
Peso	77 kg
Actividade
Ocupación	futbolista
Período de actividade	1974 - 1985
Deporte	fútbol
Posición de xogo	Centrocampista
Traxectoria   Equipo 1971–1974   Sociedad Deportiva Eibar 1974–1985   Real Sociedad 264 (16)   Selección nacional 1979–1979   España sub-23 5 (0) 1980–1980   España 1 (0) 1980–1981   España B 3 (0)
Participou en
xuño de 1980	Eurocopa de Fútbol Italia 1980

Traxectoria

Diego Álvarez naceu na localidade galega de Monforte de Lemos, pero sendo neno emigrou coa súa familia á localidade vasca de Éibar. Foi aquí onde comezou a xogar ao fútbol. O seu primeiro equipo foi a SD Eibar, onde debutou na tempada 1971-72 na Terceira división española.

En 1974 foi fichado pola Real Sociedad de Fútbol, un dos principais equipos da rexión. O seu debut na Primeira produciuse cando aínda non cumprira 20 anos, un 7 de setembro de 1974 e ante o Futbol Club Barcelona.

Diego xogaría 11 tempadas na Real Sociedad, sendo este o único equipo profesional da súa carreira. Tratábase dun centrocampista de corte máis ben defensivo, aínda que adoitaba marcar uns poucos goles case todos os anos. A súa estancia na Real Sociedad coincidiu coa mellor época do club. Formou parte da mellor xeración de futbolistas da historia deste club, xunto con outros mitos como Luís Miguel Arconada, Jesús María Zamora, Roberto López Ufarte, Jesús María Satrústegui ou Periko Alonso, entre outros; ante os cales a súa figura queda parcialmente eclipsada.

Con todo, Diego foi un dos puntais daquela Real Sociedad cun posto case fixo no medio campo do equipo titular realista entre 1975 e 1983. A súa bagaxe contempla 349 partidos oficiais coa Real Sociedad (263 deles en Primeira) e 23 goles (16 en Liga).

Diego logrou o subcampionato de Liga de 1979-80, no ano no que a Real bateu un récord de imbatibilidade aínda vixente na Liga española. O seu excelente papel valeulle ser convocado pola selección española aquel ano.

Nas tempadas seguintes logrou os títulos de Liga de 1980-81 e 1981-82. Foi unha peza importante do equipo bicampeón, disputando 33 e 31 partidos e marcando 3 e 1 goles; respectivamente aquelas tempadas. Tamén gañou a Supercopa de España de 1982, a primeira vez que se disputou este torneo e alcanzou as semifinais da Copa de Europa na tempada 1982-83.

A partir de 1983 a súa estrela comezou a declinar e a tempada 1984-85 estivo practicamente inédito (só xogou 2 partidos). Retirouse do fútbol ao finalizar aquela campaña, con 30 anos e medio de idade.

Tamén disputou en 1979 un partido amigable coa Selección de Euskadi ante Bulgaria.

Selección de España

En 1979 foi internacional sub-23, e o 26 de marzo de 1980 debutou coa Selección de fútbol de España en Barcelona nun amigable contra Inglaterra, que venceu 0-2. Foi convocado para a disputa da Eurocopa de fútbol 1980, pero non chegou a disputar un só minuto naquela competición.

Clubs

Equipo	Categoría	Ano
SD Eibar	Terceira División	1971-1974
Real Sociedad	Primeira División	1974-1985

Títulos

Campionatos nacionais

Título	Club	País	Ano
Liga	Real Sociedad	España	1981
Liga	Real Sociedad	España	1982
Supercopa	Real Sociedad	España	1982

Véxase tamén

Ligazóns externas

• Ficha da Selección Española (en castelán)