Illas Sarónicas
As illas Sarónicas (grego Σαρωνικά Νησιά Saronikà Nisià) son un grupo de illas situadas no golfo Sarónico, que se abre entre as rexións gregas da Ática e do Peloponeso. As principais illas habitadas deste grupo son Salamina (onde a armada grega derrotou aos persas na famosa batalla de Salamina), Exina, Angistri e Poros. As illas de Hidra e Dokos, situadas diante da costa da Argólida, no Peloponeso (e que en realidade se atopan entre o golfo Sarónico e o golfo Argólico), ás veces tamén son consideradas parte das illas Sarónicas, e entón este conxunto adóitase chamar illas Argosarónicas (en grego Αργοσαρωνικά Νησιά, Argosaronikà Nisià).
Moitos gregos do continente teñen segundas residencias nestas illas, que están comunicadas con servizos regulares de ferris desde os portos do Pireo e do Peloponeso.