Amenhotep fillo de Hapu

Amenhotep fillo de Hapu, en exipcio Amenhotep sa Hapu, nado contra o 1440 a.C. e finado contra o 1360 a.C., foi un arquitecto exipcio que estivo ao servizo do faraón Amenofis III.

Amenhotep fillo de Hapu

Biografía
Nacemento	século XV a. C. Athribis (en)
Morte	século XIV a. C.
Actividade
Ocupación	arquitecto , sacerdote
Período de tempo	Antigo Exipto

Para outras páxinas con títulos homónimos véxase: Amenhotep.

Amenhotep fillo de Hapu, Museo de Luxor

Biografía

Naceu en Athribis. Seu pai, Hapu ou Habu, era escribán e sacerdote, e a súa nai chamábase Ity.

Entrou ao servizo do faraón, chegando a obter numerosos títulos, algúns militares, outros relixiosos e outros civís; entre os derradeiros o principal foi o de Xefe de todos os traballos do rei o que viña a equivaler ás funcións de arquitecto real.

Deseñou un templo en Tebas do que só fican os coñecidos colosos de Memnón. Outras edificacións foron templos en Luxor, Karnak ou Soleb e aínda o Pazo de Malkata en Tebas.

Puido alzar a súa tumba próxima a do faraón, nun templete funerario que foi autorizado polo mesmo Amenofis III.

Amenhotep morreu á idade duns 80 anos, arredor do 1360 ou 1350 a.C., durante o tricésimoprimeiro ano do reinado de Amenofis III. Certas hipóteses, que recollera o sacerdote exipcio Manetón, suxiren que foi asasinado ou obrigado a se suicidar por instigación de seguidores do deus Atón (pois foi un afervoado seguidor de Amón).

Culto

un dos colosos de Memnón, obra de Amenhotep fillo de Hapu

No período tolemaico foi adorado como un deus curador, ao igual que o seu predecesor Imhotep, gozando en Tebas dalgunhas capelas dedicadas.

Iconografía

Consérvanse varias representacións do arquitecto na que aparece como un escribán sentado, ben na súa xuventude ou ben na ancianidade.

Véxase tamén

Ligazóns externas

• Encyclopedia Britannica: Información acerca de Amenhotep fillo de Hapu (en inglés)