Adolf Schmal

Adolf Schmal, nado en Dortmund o 18 de setembro de 1872 e finado en Salzburgo o 28 de agosto de 1919, foi un tirador de esgrima, ciclista e xornalista deportivo austríaco.

Adolf Schmal
Nome completo	Felix Adolf Schmal
Alcume	Filius e Schmal-Filius
Nacemento	18 de setembro de 1872
Lugar de nacemento	Dortmund
Falecemento	28 de agosto de 1919
Lugar de falecemento	Estado de Salzburgo
Nacionalidade	Austria
Ocupación	esgrimista, ciclista e xornalista
Irmáns	Felix Schmal
[ editar datos en Wikidata ]

Adolf Schmal era coñecido como tirador da modalidade de sabre. Nos Xogos Olímpicos de 1896 Schmal xa tiña dúas vitorias e estaba en clara vantaxe cando, segundo conta John MacAloons no seu libro This Great Symbol. Pierre de Coubertin and the Origins of the Modern Olimpic Games (1981), fixo a súa entrada no estadio o rei grego e o torneo quedou anulado, volvendo a empezar e nesta segunda volta gañou só a Georgios Iatridis, quedando cuarto sobre cinco participantes.

Días despois deron comezo as probas ciclistas no Velódromo Neo Phaliron, quedando terceiro en 333 metros contra reloxo e 10 quilómetros pero o seu mellor resultado veu dous días despois ao gañar a proba de 12 horas, ao cubrir 314'997 km. Sobre a súa participación nos olimpiadas escribiu unhas memorias Wie ich einen olympischen Lorbeer verlor - und einen gewann que se publicaron en 1919. Despois de rematar a súa carreira atlética dedicouse ao automobilismo e co pseudónimo de "Filius“ e máis tarde de Schmal-Filius, converteuse nun dos xornalistas do motor máis importantes de Austria. Foi editor do Illustrierten Allgemeinen Radfahrerzeitung, foi cofundador con Felix Sterne, e director entre 1900 e 1919, do Allgemeine Automobil-Zeitung.

Obras

• Ohne Chauffeur. Ein Handbuch; 1904
• Die Kunst des Fahrens
• Eine Automobil-Reise durch Bosnien, die Hercegovina und Dalmatien. 1908