Abrir o menú principal

O accidente da Lavacolla, tamén coñecido coma accidente do Españoleto, foi o segundo percance de importancia na historia da aviación comercial en Galicia. O 3 de marzo de 1978, un avión DC-8 da compañía Iberia procedente de Madrid tomou terra lonxe do comezo da pista do aeroporto da Lavacolla, obrigando ao piloto a esquivar bruscamente a estrutura do sistema ILS da cabeceira sur e caendo por un valado. Non houbo vítimas mortais.

Accidente da Lavacolla
Iberia - McDonnell Douglas DC-8-63.jpg
O Españoleto en 1969
Resumo
Data  3 de marzo de 1978
Causa  aquaplaning tras a aterraxe
Lugar  aeroporto da Lavacolla
Orixe  Madrid
Destino  Santiago de Compostela
Finados  0
Feridos  70
Aeronave
Tipo de aeronave Douglas DC-8
Operador  Iberia
Rexistro  EC-BMX
Pasaxeiros  208
Tripulación  12
Superviventes  220 (todos)

O accidenteEditar

O avión accidentado era un DC-8-63 da compañía Iberia con rexistro EC-BMX procedente de Madrid, de nome Españoleto, pilotado polo comandante Jaime Ordovás e levaba a bordo a 208 pasaxeiros e 12 tripulantes. A hora prevista para a súa chegada eran as 17:05 horas da tarde, porén chegaba ao aeroporto da Lavacolla con 20 minutos de atraso.

Unha manobra de aterraxe incorrecta provocou que o avión tomase terra lonxe do comezo da pista. Logo de que o piloto evitase o impacto contra a estrutura do sistema ILS da cabeceira sur, a aeronave caeu por un valado, incendiándose posteriormente.

O piloto, que afirmou contar con boa visibilidade durante a manobra de aterraxe, indicou que as fortes precipitacións que media hora antes asolagaron a pista foron a causa de que o McDonell Douglas DC-8 que pilotaba sufrise o fenómeno do aquaplanning ao tocar o chan.

A pericia do piloto e a rápida actuación dos bombeiros e dos demais servizos de emerxencia evitaron un accidente máis grave.

VítimasEditar

O accidente saldouse con setenta feridos, dez graves e sesenta leves, que foron atendidos no hospital Xeral de Galicia, no policlínico da Rosaleda e nos sanatorios dos doutores Álvarez e Señarís.

No Españoleto viaxaban persoeiros relacionados coa política, como o ministro de Cultura Pío Cabanillas ou destacados centristas coruñeses como José Luis Meilán Gil, Antonio Vázquez Guillén e Nona Inés Vilariño.