Isabel Blanco

Para outras páxinas con títulos homónimos véxase: Isabel Blanco (homónimos).

Isabel Blanco Picallo, nada en Berna (Suíza) o 8 de setembro de 1974, é unha actriz de televisión, cine e teatro, e presentadora galega.

Isabel Blanco

Biografía
Nacemento	8 de setembro de 1971 (52 anos) Berna, Suíza
Datos persoais
País de nacionalidade	España
Actividade
Ocupación	presentadora , actriz
Lingua	Lingua galega e lingua castelá
Páxina web	isabelblanco.es

Traxectoria

Naceu na cidade suíza de Berna, sendo filla de dous emigrantes galegos dos lugares de Randufe e A Illa, no concello de Santa Comba. Trasladouse a Galicia na súa adolescencia. Licenciouse en Tradución e Interpretación de inglés e alemán e mesmo chegou a exercer como intérprete no Hostal dos Reis Católicos de Santiago de Compostela. Porén, no ano 1996 e despois de superar unha proba de selección para a TVG, iniciou a súa carreira televisiva como co-presentadora do espazo de humor A repanocha canda Tacho González. En 1998 deu o salto á interpretación actoral ao poñerse na pel de María Ares en Mareas vivas, da que principiou sendo a protagonista canda Luís Tosar e da que rodou máis de 150 capítulos entre 1998 e 2002. A serie foi un éxito de masas entre o público galego e grazas a ela Isabel Blanco acadou gran sona.

Máis tarde participou noutras producións para a TVG coma Rías Baixas (2000), Avenida de América (2002) ou Efectos secundarios (2007), ademais doutras de ámbito estatal como Nada es para siempre (1999-2000) ou Manolo & Benito Corporeision emitidas en Antena 3, Yo soy Bea (2008) emitida en Telecinco ou Cuéntame cómo pasó en TVE. Nos últimos anos tamén presentou os programas para a TVG Pasaporte galego (2018), Desmontando Galicia (2021-2023) e Desexo concedido (2022).

En cine destacan os seus traballos en A ti como se che di adeus? (1999), curtametraxe de Jorge Coira; Autopsia (2002), de Milagros Bará; O lapis do carpinteiro (2003), de Antón Reixa; Rosas (2005), curtametraxe de Mikel Fuentes; Cicatrices (2006), curtametraxe de Jairo Iglesias; Vida de familia (2007), de Llorenç Soler; El vestido (2008), de Paula de Luque; Agallas (2008), de Andrés Luque Pérez e Samuel Martín; así como a triloxía de Carlos Iglesias sobre a emigración española no século XX composta polos filmes Un franco, 14 pesetas (2006), Ispansi (2010) e 2 francos, 40 pesetas (2014).

Foi vicepresidenta da Academia Galega do Audiovisual e delegada de Galicia para AISGE (Actores e Intérpretes, Sociedad de Gestión). Gañou en dúas ocasións o premio Mestre Mateo á mellor interpretación protagonista feminina.

En 2019 foi galardoada do Premio Celanova, Casa dos Poetas.

Filmografía

Cine

• ¿A ti como se che di adeus? (1999), de Jorge Coira. Como Noiva.
• Autopsia (2002), de Milagros Bará. Como Amanda.
• O lapis do carpinteiro (2003), de Antón Reixa.
• Rosas (2005), de Mikel Fuentes.
• Un franco, 14 pesetas (2006), de Carlos Iglesias. Como Hannah.
• Cicatrices (2006), de Jairo Iglesias. Como Elena.
• Vida de familia (2007), de Llorenç Soler. Como Nuria.
• Si te vira teu pai (2007), de Héctor Carré.
• O Limia, o rio do esquecemento (2008) curtametraxe. Como Carmiña.
• Ispansi (2011), de Carlos Iglesias. Como Rosario.
• Invasor (2012), de Daniel Calparsoro.
• 2 francos, 40 pesetas (2014), de Carlos Iglesias. Como Hannah.
• O home e o can (2022), de Ángel de la Cruz. Como Marta.

Televisión

• Mareas vivas (1998-2002) na TVG. Como María Ares.
• Nada es para siempre (1999-2000) en Antena 3. Como Irene.
• Rías Baixas (2000) na TVG.
• Avenida de América (2002) na TVG.
• Manolo y Benito Corporeision (2007) en Antena 3. Como Rosi.
• Efectos secundarios (2007) na TVG. Como Alicia.
• Todos os santos (2013). Filme para a TVG.
• Casa Manola (2014). Como Vero.
• Verão M (2018). Como Carmiña.

Como presentadora

• A repanocha (1996-1998) na TVG.
• O rei da comedia (2002) na TVG.
• As viaxeiras da Lúa (2003) na TVG.
• Pasaporte galego (2018) na TVG.
• Desmontando Galicia (2021-2023) na TVG.
• Desexo concedido (2022) na TVG.

Galardóns e nomeamentos

Premios Mestre Mateo

Ano	Categoría	Filme	Resultado
2006	Mellor actriz	Un franco, 14 pesetas	Gañadora
2013	Mellor actriz	Todos os santos	Gañadora

Véxase tamén

Ligazóns externas

• Páxina oficial de Isabel Blanco Arquivado 09 de decembro de 2021 en Wayback Machine.
• Consello da Cultura Galega
• Axencia Audiovisual Galega
• Galegos.info