Unidá na manifestación do "día de les lletres asturianes" de 2007.

Unidá é unha federación de partidos formada por Esquerda Asturiana, militantes provenientes de Andecha Astur (tras unha división no partido que se mantén nos xulgados), e polos partidos locais Andecha por Carreño, Asturianistes por Nava e Asturianistes por Piloña, ademais está formando unha serie de formacións locais xa co nome de Unidá como Unidá-Avilés ou Unidá-Uviéu.

Esta organización é de carácter nacionalista asturiana, de esquerda e ecoloxista, para as eleccións autonómicas e municipais de maio de 2007 presentouse como coalición con outro partido máis, Los Verdes-Grupu Verde que abandonaría a formación meses despois.

A coalición constituíase dafeitu en abril de 2007. No mesmo mes presentan oficialmente ao seu candidato á Xunta Xeneral, o recoñecido escritor e médico psiquiatra Ignaciu Llope. Así mesmo, marcan as línias xerais do seu acordo programático, que incluían a defensa da lingua, cultura e identidade asturiana; a loita contra a crise económica e laboral que sofre Asturias, así como a corrupción en certos niveis e os atentados ecolóxicos que cren que provoca o goberno actual; e, en xeral, a implantación dun novo modelo de desenvolvemento territorial, a partir dun Estatuto de Autonomía novo que supoña unha ampliación importante en comparación co actual, e que consideran imprescindible, ademais dunha aposta por unha opción que de continuidade a unha unidade que cren que o nacionalismo asturiano de esquerda necesitaba desde facía anos.