Tinker Tailor Soldier Spy (filme)

Tinker Tailor Soldier Spy é un filme de 2011 dirixido por Tomas Alfredson. O guión foi escrito por Bridget O'Connor e Peter Straughan, e baséase na novela homónima de 1974 escrita por John le Carré. Está protagonizado por Gary Oldman como George Smiley, con Colin Firth, Tom Hardy, John Hurt, Toby Jones, Mark Strong, Benedict Cumberbatch, Ciarán Hinds, David Dencik e Kathy Burke como parte do elenco. A acción está ambientada en Londres a comezos da década de 1970 e conta a historia da caza dun axente dobre soviético infiltrado na cúpula do servizo secreto británico.

Tinker Tailor Soldier Spy
Ficha técnica
Título orixinal	Tinker Tailor Soldier Spy
Director	Tomas Alfredson
Produtor	Tim Bevan Eric Fellner Robyn Slovo Peter Morgan
Guión	Bridget O'Connor Peter Straughan
Baseado en	Tinker Tailor Soldier Spy de John le Carré
Intérpretes	Gary Oldman Kathy Burke Benedict Cumberbatch Colin Firth Stephen Graham Tom Hardy Ciarán Hinds John Hurt Toby Jones Simon McBurney Mark Strong
Música	Alberto Iglesias
Fotografía	Hoyte van Hoytema
Montaxe	Dino Jonsäter
Estudio	StudioCanal Karla Films Paradis Films Kinowelt Filmproduktion Working Title Films
Distribuidora	StudioCanal
Estrea	Festival de Venecia: 5 de setembro de 2011
Duración	127 minutos
Orixe	Reino Unido Francia Alemaña
Xénero	Suspense e espías
Orzamento	21 millóns de dólares
Recadación	81,2 millóns de dólares
Na rede
https://www.focusfeatures.com/tinker_tailor_soldier_spy

Sinopse

Situada na década de 1970, no contexto da guerra fría, o fracaso dunha misión especial en Hungría provoca unha remuda na cúpula dos servizos secretos británicos. Un dos defenestrados é o axente George Smiley (Oldman). Porén, cando xa se afixera á idea de se retirar, encárganlle unha misión especial. Sospéitase que hai un «axente encuberto» na cúpula do servizo e só alguén externo pode descubrir quen é. Coa axuda doutro axente desafiuzado e outro en actividade, Smiley irá recollendo información e encaixando as pezas para tentar descubrir o traidor.

Personaxes

• Gary Oldman como George Smiley ("Beggarman")
• Colin Firth como Bill Haydon ("Tailor")
• Tom Hardy como Ricki Tarr
• Mark Strong como Jim Prideaux
• Ciarán Hinds como Roy Bland ("Soldier")
• Benedict Cumberbatch como Peter Guillam
• David Dencik como Toby Esterhase ("Poorman")
• Stephen Graham como Jerry Westerby
• Simon McBurney como Oliver Lacon
• Toby Jones como Percy Alleline ("Tinker")
• John Hurt como Control
• Kathy Burke como Connie Sachs
• Roger Lloyd-Pack como Mendel
• Svetlana Khodchenkova como Irina
• Konstantin Khabensky como Polyakov
• Michael Sarne como Karla
• John le Carré como convidado na festa de Nadal
• Katrina Vasilieva como Ann Smiley