Abrir o menú principal

A tenase ou complexo tenase é un complexo proteico que actúa na coagulación do sangue como proteína activadora que activa o factor X (factor dez) orixinando por clivaxe o factor Xa por dous modos: extrinsicamente ou intrinsicamente.

Tenase é unha contracción da palabra inglesa "ten" ('dez') e o sufixo propio dos encimas "-ase", dado que o substrato ao que activa este complexo é o factor X (dez) de coagulación do sangue. Ás veces abréviase como Xase.

O complexo tenase extrínseco está constituído por: factor tisular (unha proteína unida a membranas), factor VII e Ca2+ como ión activador.[1]

O complexo tenase intrínseco contén o factor IX activo (IXa), o seu cofactor factor VIII (VIIIa), o substrato (factor X), os cales son activados por superficies cargadas negativamente (como vidro, membranas de plaquetas activas, e ás veces membranas de monocitos).[2] Estes factores procoagulantes dependentes de vitamina K atracan sobre estas superficies por medio do seu dominio Gla con pontes de Ca2+.[3] Isto fai o proceso de activación moito máis rápido e bloquea a unión de inhibidores.[4]

Como a tenase intrínseca activa o factor X a unha velocidade de 50 a 100 veces maior que a tenase extrínseca, desempeña un papel esencial na amplificación do factor Xa e na xeración de trombina durante a fase de propagación da coagulación.[4]


NotasEditar

  1. T. A. Kovalenko, M. A. Panteleev, A. N. Sveshnikova. The mechanisms and kinetics of initiation of blood coagulation by the extrinsic tenase complex. Biophysics. March 2017, Volume 62, Issue 2, pp 291–300. [1]
  2. L. Autin, W. H. Lee, M. A. Miteva, K. Mertens, K. P. Radtke e B. O. Villoutreix. Molecular Models of the Procoagulant Intrinsic Tenase Complex. Blood 2004 104:1723. [2]
  3. Mark D. Blostein, Barbara C. Furie, Isabelle Rajotte e Bruce Furie. The Gla Domain of Factor IXa Binds to Factor VIIIa in the Tenase Complex. The Journal of Biological Chemistry. Vol. 278, No. 33, número de agosto 15, pp. 31297–31302, 2003. [3]
  4. 4,0 4,1 Science Direct Tenase