Reiseñor do Xapón

O leiotrix pico-vermello^{[Cómpre referencia]} ou reiseñor do Xapón^{[Cómpre referencia]} (Leiothrix lutea) é unha especie de ave paseriforme da familia Leiothrichidae.

Ovo de Leiothrix lutea calipyga

Distribución natural

Especie orixinaria do sur de Asia, desde Tailandia até o sur de China.

O nome en galego pode resultar confuso xa que o reiseñor do Xapón nin é un reiseñor (aves da familia Muscicapidae) nin é orixinario do Xapón.

Distribución actual

Algunhas poboacións foron introducidas no Xapón e Hawai onde só viven desde os anos 80 do século XX,tamén existen varias colonias en Europa de aves escapadas presentes en Portugal, Francia e en España onde está recoñecida como especie invasora debido ao seu establecemento na Serra de Collserola, xunto ao núcleo urbano de Barcelona.

O carácter invasor desta especie motivou a prohibición da súa importación, venda, cría e liberación ao medio ambiente no Xapón.

Conservación e ameazas

A súa distribución é moi ampla desde o sur do Himalaia e sueste asiático até a China, o seu rango de distribución é moi grande e a UICN non a cataloga como especie ameazada a pesar da destrución do seu hábitat e a súa captura como ave de gaiola.

Características

Esta especie é moi apreciada polos amantes das aves do mundo enteiro debido a que o macho posúe un marabilloso canto equiparable ao do reiseñor común, ademais posúen unhas atractivas cores e adáptanse con facilidade á vida en catividade. A cría en catividade é moi complicada.

A alimentación do reiseñor do Xapón é principalmente insectívora, cazando todo tipo de insectos e vermes. Tamén se alimentan de bagas e froitas.

Carácter invasor en España

Debido ao seu potencial colonizador e constituír unha ameaza grave para as especies autóctonas, os hábitats ou os ecosistemas, esta especie foi catalogada no Catálogo Español de Especies exóticas Invasoras, aprobado por Real Decreto 1628/2011, de 14 de novembro, estando prohibida en España a súa introdución no medio natural, posesión, transporte, tráfico e comercio.