Mark Shuttleworth
Mark Richard Shuttleworth, nado o 18 de setembro de 1973 en Welkom, Suráfrica, é un informático, empresario e turista espacial[1][2][3] surafricano. É o fundador da empresa Canonical Ltd., unha empresa promotora do software libre.
| Mark Shuttleworth | |
|---|---|
 Mark Shuttleworth, despois do seu discurso en Linuxtag en Wiesbaden.(2006) | |
| Datos persoais | |
| Nacemento | 18 de setembro de 1973, (50 anos) |
| Lugar | Welkom  Suráfrica |
| Nacionalidade | surafricano/británico |
| Actividade | |
| Ocupación | Informático e empresario |
| Misións | Soyouz TM-34 Soyouz TM-34 |
| Tempo no espazo | 9 días, 21 horas e 25 minutos |
| Insignias |  |
| [ editar datos en Wikidata ] | |
Traxectoria Editar
Mark Shuttleworth naceu na vila mineira de Welkom, Estado Libre, Suráfrica, o seu pai é cirurxián e a súa nai unha mestra dunha escola de enfermería. Creceu na cidade do Cabo onde obtivo un BBusSci en Finanzas e información de sistemas na universidade da Cidade do Cabo, vivía no Smuts Hall, ademais participou na instalación das primeiras conexións residenciais de internet na súa universidade.
Traballo Editar
En 1995, o seu último ano na universidade, funda a empresa de seguridade en Internet Thawte, especializada en certificados dixitais e seguridade en internet, que vende en 1999 a VeriSign por 575 millóns de dólares.
Shuttleworth fundou en marzo de 2004 a empresa Canonical Ltd., para a promoción e soporte comercial de proxectos de software libre e código aberto, tamén financiou o proxecto Ubuntu, unha distribución de GNU/Linux baseada en Debian, en 2001 forma a fundación Shuttleworth, sen fins de lucro e dedicada á innovación social que tamén apoia educación gratuíta e proxectos de software libre en Suráfrica, como o Freedom Toaster.
En setembro do 2000, formou HBD Venture Capital, unha incubadora de empresas e provedora de capitais de risco. En marzo de 2004 formou Canonical Ltd., para a promoción e soporte comercial de proxectos de software libre. En decembro de 2009, deixa de ser o director executivo de Canonical Ltd.
Viaxe espacial cara á ISS Editar
Foi o primeiro africano no espazo e o primeiro turista espacial surafricano. O 25 de abril de 2002, a nave Soiuz TM-34 engalou no cosmódromo de Baikonur cara á Estación Espacial Internacional cunha tripulación formada por tres persoas: o piloto-cosmonauta ruso Yuri Gidzenko como comandante da misión, o cosmonauta-investigador italiano Roberto Vittori e o cosmonauta-enxeñeiro surafricano Mark Shuttleworth.
O segundo cosmonauta "turista" na historia, despois do voo do millonario estadounidense Dennis Tito na Soiuz TM-32, prefire non ser considerado un simple turista, e por iso puxo gran énfase nos aspectos educativos e científicos da súa misión. Levou a cabo experimentos científicos nas áreas de fisioloxía e fenómenos de cristalización, así como outros relativos á investigación das células nai.
Logo de 8 días a bordo da Estación Espacial Internacional (e 10 días de estancia no espazo), a tripulación conformada por Gidzenko, Vittori e Shuttleworth regresou á Terra a bordo da Soiuz TM-33, naquel momento axustada á Estación. A misión da Soiuz TM-34 foi a cuarta que viaxaba á Estación Espacial Internacional e a última de dita variante TM da venerable nave, sendo substituída logo pola Soiuz TMA.
Notas Editar
- ↑ BBC News Online, ed. (12 decembro 2001). "Nasa makes space tourism U-turn". Consultado o 2 setembro de 2012.
approval to plans to make the South African internet millionaire Mark Shuttleworth
- ↑ "Space tourist lifts off". BBC News Online. 25 April 2002. Consultado o 2 setembro 2012.
South African internet millionaire Mark Shuttleworth is heading for a short stay
- ↑ "International Space Station: Soyuz 3 Taxi Flight Crew: Mark Richard Shuttleworth". 4 April 2004. Arquivado dende o orixinal o 05 de abril de 2017. Consultado o 2 September 2012.
Mark was born on 18 September 1973 in mining town Welkom, in South Africa's Free State province
Véxase tamén Editar
| A Galicitas posúe citas sobre: Mark Shuttleworth |
| Wikimedia Commons ten máis contidos multimedia na categoría: Mark Shuttleworth |
Outros artigos Editar
- Ubuntu, distribución Linux financiada por Shuttleworth.
- Space Adventures
Ligazóns externas Editar
- Sitio web oficial (en inglés)
- Datos biográficos do cosmonauta, en inglés e en alemán, en SpaceFacts.de
- Primeiro africano no espazo (en inglés)
- Mark Shuttleworth (en inglés)
- Sitio web oficial de Ubuntu (en inglés)
- Fundación Shuttleworth (en inglés)
- Acerca de Mark Shuttleworth, (en inglés)
- A misión Soiuz TM-34 (en inglés)