José Barro (automoción)
José Barro foi unha fábrica de automóbiles galega, creada en 1905 polo empresario galego José Barro González en Chavín (Viveiro). Foi a primeira fábrica de automóbiles de Galicia. Construíu carrozarías que logo montaba en chasis que importaba de Francia.
| José Barro | |
|---|---|
| Fundación | 1905 |
| Localización | Chavín, Viveiro |
| Fundador | José Barro González |
| [ editar datos en Wikidata ] | |
Este empresario de Viloalle (Mondoñedo) era un apaixonado por todo o que levase algún tipo de motor, hélice ou turbina. Chegou a Chavin en 1895 con só 22 anos e comezou a súa carreira empresarial coa construción dunha pequena central eléctrica. Ao mesmo tempo, adquiriu un antigo taller de teares, que pouco a pouco se converteu nunha das fábricas de automóbiles máis avanzadas do seu tempo.
Historia editar
En 1904 José Barro viaxou a París decidido a mercar dous autobuses coa idea de crear un servizo de transporte entre Viveiro e Baamonde. Non obstante, regresou cunha licenza exclusiva para a venda de vehículos, autobuses e camións da marca De Dion-Bouton para Galicia e Asturias. Un ano despois comezaron a chegar os primeiros chasis De Dion Bouton de París, famosos pola súa fiabilidade e dureza. Barro, ademais da venda, ofrece servizos de reparación para todo tipo de vehículos. Coches de Valladolid, León ou mesmo Madrid comezaron a estar entre os seus clientes.
Carrocerías viveirenses editar
Durante a primeira guerra mundial o fabricante francés non pode fornecer as pezas necesarias á fábrica de Chavín, polo que o empresario vese obrigado a carrozar e construír pezas. Deste xeito, convértese nunha fábrica para a construción de carrozarías e montaxe de vehículos, autobuses e camións ata o final dos seus días. Nos anos 30, esta empresa ocupa unha das posicións máis altas da clasificación nacional en termos de produción de material automotriz, con sinais de identidade como a solidez e acabado dos seus autobuses e camións.
Unha característica única destes modelos carrozados en Chavín é a súa estrutura de madeira feita por carpinteiros de ribeira. Os artesáns expertos en embarcacións aplicaron os seus coñecementos en estruturas mariñas ás carrozarías de automóbiles, o que elevou a calidade en termos de resistencia e finura dos acabados.
Durante a guerra civil española construíu equipos militares, retomou as súas anteriores funcións ao final da guerra ata a súa morte en 1943. Os seus herdeiros dividiron a compañía en dúas liñas de negocio e a mantiveron ata que a crise económica de finais da década de 1970 obrigounos a pechar definitivamente no ano 1981.
Notas editar
Véxase tamén editar
Bibliografía editar
- Nuevo Cal, Carlos (2006). CIEF Centro de Investigación Económica e Financeira; Fundación Caixa Galicia, ed. "Un precursor da industria da automoción en Galicia" in Empresarios de Galicia. pp. 303–317.