Ferrol Vello

Ferrol Vello é un barrio histórico, orixe mariñeira da cidade de Ferrol, orientado cara ao porto e refuxiado no fondo da ría de xeito compacto.

Ferrol Vello

Localización
43°28′44″N 8°14′35″O
Estado	España
Comunidade autónoma	Galicia
Provincia	provincia da Coruña
Concello	Ferrol
Elemento da Lista Vermella do Patrimonio
Data	28 de maio de 2014
Identificador	barrio-de-ferrol-vello
Ben de Interese Cultural

Para outras páxinas con títulos homónimos véxase: Ferrol Vello.

Evolución e características

Ata o século XVIII a vila de Ferrol non se estendía alén do propio Ferrol Vello e dependía das casas nobiliarias dos Lemos e dos Andrade. A comunicación co exterior facíase especialmente por mar sendo a comunicación por terra de case illamento. Ao longo do tempo mantivo a súa estrutura medieval dun xeito continuado, aínda apreciable no trazado viario e no parcelario urbano.

A tipoloxía edificatoria é diversa e vai dende casas con solaina e tipicamente mariñeiras ata aqueles edificios que presentan unha notable arquitectura art déco modernista ou racionalista. O seu estado de conservación é deficiente e as intervencións das últimas décadas moi desafortunadas.

O nome da rúa do Castro evoca as orixes de Ferrol no Ferrol Vello.

Protección

O barrio de Ferrol Vello está protexido dende o ano 2001 como conxunto dentro do PXOM. No 2006 a Comisión cidadá pola recuperación de Ferrol Vello solicitou a súa declaración como Ben de Interese Cultural á Consellería de Cultura e Deporte que, naquel momento, dirixía a conselleira do BNG Ánxela Bugallo. A incoación do procedemento para declarar Ben de Interese Cultural produciuse o 27 de febreiro de 2009, dous días antes das eleccións ao Parlamento de Galicia. Logo de case 24 meses de procedemento administrativo, no que inicialmente se deixou sen efecto a incoación da declaración, Ferrol Vello foi declarado Ben de Interese Cultural, en categoría de Conxunto Histórico, polo Consello da Xunta de Galicia o 10 de febreiro de 2011, admitindo os recursos da Comisión Cidadá Pola Recuperación de Ferrol Vello e outras entidades como o Concello de Ferrol.

Algúns dos edificios acolléronse ó plan Rexurbe mais, o conxunto na súa maioría goza dun aspecto descoidado e abandonado.^{[Cómpre referencia]}