Fanhunter (xogo de rol)

Fanhunter, el juego de rol épicodecadente é un xogo de rol de humor paródico deseñado por Chema Pamundi, desenvolvido por Xavi Garriga, e editado por Cels Piñol en 1992, ambientado no universo de ficción que este último bautizou co nome de Fanhunter. A primeira edición do xogo foi unha autoedición que consistía en 500 exemplares fotocopiados en forma de fanzine. A segunda edición, de novembro de 1993, foi publicada en rústica pola editorial Farsa's Wagon.

Ambientación

O universo do xogo non é outro que o da saga de cómics Fanhunter e a súa Barnacity, unha parodia da cidade de Barcelona na que o libreiro Alejo Cuervo (propietario na vida real da librería Gigamesh, situada na Ronda San Pere da cidade) volveuse tolo e substitúe ao Papa de Roma. Despois de dar un golpe de estado no Vaticano, decide prohibir toda forma de subcultura para impoñer o seu gusto polo autor Philip K. Dick, cuxa obra institúe como nova relixión obrigatoria. Todos aqueles seareiros doutros autores de ficción ou doutras clases de fantasía atópanse de súpeto fóra da lei, e Alejo I (así autoproclamado) decide entón formar e enviar aos fanhunters, os «cazadores de seareiros», para exterminarlos. Os seareiros, pola súa banda, non aceptan tal ditadura e organizan unha resistencia para combater a Alejo e aos seus fanhunters.