Espádice
O espádice é un tipo especial de acio, unha inflorescencia con flores pequenas apiladas sobre un raque espeso e carnoso, tomando o aspecto dunha espiga. Atópase en certas liliópsidas (monocotiledóneas), especialmente na familia Araceae, razón pola que estas se chamaban anteriormente espadicifloras.
Nestas inflorescencias existe comunmente unha espata (bráctea grande), xeralmente vistosa e solitaria, rodeando ou pechando parcialmente a partir de abaixo o espádice. A "flor" do Anthurium é un espádice típico con espata grande e vistosa. O espádice da Amorphophallus titanum é frecuentemente citado por ser "a maior das flores", aínda que se trate na realidade dunha inflorescencia.