Por censura enténdese o control da comunicación verbal ou doutras formas de expresión por parte dunha autoridade, xeralmente asociada ao poder político. Na maior parte dos casos enténdese que tal control é aplicado no ámbito da comunicación pública, por exemplo a efectuada por medio da prensa ou dos mass media; mais pódese aínda referirse ao control da expresión individual.

Caricatura do século XIX

Consonte os significados que o termo pode adoptar en contextos particulares, pódense citar os seguintes tipos de censura:

Tipos de censura editar

 
Expediente de censura d'A esmorga, de Eduardo Blanco Amor. 1969.

Censura militar editar

A censura militar impide a suxeitos da milicia (soldados ou mandos) expor opinións e divulgar informacións que poidan pór en cuestión as institucións militares ou poidan comprometer a seguranza.

Censura política editar

Nos réximes autoritarios a censura política impide a individuos, asociacións, partidos e medios de información, divulgar informacións e manifestar puntos de vista contrarios ás opinións do poder executivo. Tal censura realízase a través da prohibición de tocar determinados asuntos ou a través do control preventivo dos contidos divulgados polos medios de comunicación.

Censura relixiosa editar

A censura relixiosa está presente en moitas relixións, tanto no pasado, como hoxe. Entre os exemplos históricos baste lembrar o Índice de libros prohibidos da Igrexa católica, abolido no século pasado. Dado o contexto histórico no que se exercía, segundo algúns, era en realidade, un caso de censura política, antes que relixiosa. Segundo outros esta observación resulta bastante banal, dado que calquera actividade humana ocorre sempre "nun contexto histórico".

Censura carceraria editar

Nos sistemas carcerarios a censura serve para impedir que persoas sometidas a restricións de liberdade, a través dos medios de comunicación ao seu alcance (teléfono, correspondencia, visitas de familiares), poidan continuar a delinquir.

Censura moral e estética editar

A censura moral ten a finalidade de impedir que mensaxes reputados como moralmente incorrectos, ofensivos, vulgares ou, outramente, inconvenientes poidan chegar ata o público ou facelo de modo indiscriminado. Un exemplo é a censura aplicada á pornografía e a representacións explícitas da violencia, e que non limitan exclusivamente a accesibilidade aos menores de idade.

Autocensura editar

Fálase ás veces de autocensura cando a censura é realizada polo mesmo suxeito que explica unha opinión ou divulga informacións, a fin de evitar difundir contidos desagradábeis para terceiros ou para evitar incorrer en censura. A organización das empresas editoriais presupón, inevitabelmente, unha forma de control e selección dos artigos por parte do director responsábel, sexa por recaer en posíbel responsabilidade xudicial en caso de omitir o control, sexa por garantir a denominada "liña editorial" da empresa. Neste último caso, a maioría dos ordenamentos legais carecen dunha resposta prevista.

Censura encuberta editar

Cabe que ocasionalmente unha información orixinal e específica, cuxa mesma existencia é practicamente descoñecida polo grande público, sexa sometida a unha situación de quasi-censura, estando clasificada como “subversiva” ou “inconveniente”. En agosto de 2006, o texto de 1978 de Michel Foucault, As leis do pudor, publicado orixinariamente en francés co título de La loi de la pudeur, que se declara a favor da abolición da idade do consentimento, practicamente desapareceu de Internet, tanto en inglés, como en francés ou en español ou en italiano, e non apareceu tampouco nos sitios web dedicados ao autor.