Asasinato de Robert F. Kennedy
O asasinato de Robert F. Kennedy, senador dos Estados Unidos e irmán do presidente dos Estados Unidos John F. Kennedy, ocorreu pouco despois da medianoite do 5 de xuño de 1968 nos Ánxeles, no estado de California. Pouco antes do atentado, Kennedy estaba cos seus seguidores celebrando a vitoria nas eleccións primarias do estado de California, realizadas en plena carreira electoral para decidir quen sería o candidato demócrata nas eleccións presidenciais do mes de novembro daquel mesmo ano. Kennedy foi tiroteado mentres camiñaba pola cociña do Hotel Ambassador, onde se atopaba seguindo os resultados. As lesións producidas polo atentado foron graves abondo para provocar a súa morte, que se produciu no Hospital The Good Samaritan vinte e seis horas máis tarde. Sirhan Sirhan, un inmigrante de orixe palestina de 24 anos,[1][2] foi declarado culpable do asasinato de Kennedy e condenado a morte, sentenza que foi posteriormente conmutada pola cadea perpetua.
A capela ardente do corpo de Kennedy instalouse en Nova York, concretamente na catedral St. Patrick, o cal permitiu que fose visitada por un gran número de persoas durante os dous días que precederon a un multitudinario funeral. O seu corpo atópase soterrado preto do seu irmán John no Cemitirio Nacional de Arlington. A súa morte supoxo un aumento da protección dos candidatos presidenciais por parte do Servizo Secreto dos Estados Unidos. Hubert Humphrey, vicepresidente saínte, foi nomeado candidato demócrata á presidencia, pero finalmente foi derrotado por Richard Nixon.
Do mesmo xeito que a morte do seu irmán, o asasinato de Robert Kennedy e as circunstancias que o envolven deron pé a un gran número de hipóteses e teorías conspiratorias. É un dos dous únicos senadores estadounidenses asasinados (o outro foi Huey Long).
Notas editar
- ↑ "A busboy kneels again next to RFK". Los Angeles Times.
- ↑ Jud Etsy-Kendall, Emma Bowman, "The Busboy who Cradled a Dying RFK Recalls Those Final Moments", "NPR Storycorps", 1 de xuño de 2018
Véxase tamén editar
Wikimedia Commons ten máis contidos multimedia na categoría: Asasinato de Robert F. Kennedy  |
Bibliografía editar
- Clarke, Thurston (27 de maio de 2008). The Last Campaign: Robert F. Kennedy and 82 Days That Inspired America. Macmillan. ISBN 978-0-8050-7792-6.
- Melanson, Ph.D, Philip H. (1 de xuño de 1991). The Robert F. Kennedy Assassination: New Revelations on the Conspiracy and Cover-Up, 1968–1991. Nova York: Shapolsky Publishers. ISBN 978-1561713240.
- Moldea, Dan E. (1995). The Killing of Robert F. Kennedy: An Investigation of Motive, Means, and Opportunity. Nova York: Norton. ISBN 978-0-393-03791-3.
- Witcover, Jules (1969). 85 Days: The Last Campaign of Robert Kennedy. Nova York: Putnam. OCLC 452367.