Pedro Theon
Pedro Theon, orixinalmente Petrus Theon, falecido despois de 867, foi un nobre galego, pai do primeiro conde portucalense Vímara Pérez.
| Biografía | |
|---|---|
| Datos persoais | |
| País de nacionalidade | Reino de Galicia Reino de Asturias  |
| Outro | |
| Título | Conde |
| Fillos | Vímara Pérez, Hermenexildo Pérez |
| Pai | Vermudo I o Diácono |
Traxectoria editar
A crónica Albeldense fala dun Pedro que en 859, mentres reinaba Ordoño I, derrotou aos viquingos en Galicia. Segundo o profesor Allen Mawer poderían ter sido os fillos de Ragnarr Lodbrok[1] (Hastein e Björn Ragnarsson) e que segundo relata a crónica os normandos ( Lordomani ) foron derrotados polo conde Pedro:
Ejus tempora Lordomani iterum venientes in Gallaeciae maritimis, a Petro comite interfecti sunt.[2]
Os viquingos atacaron as rías Altas e pola ría de Arousa chegaron á sede episcopal de Iria Flavia, que saquearon. Asentáronse aos arredores de Santiago de Compostela e asediárona. O conde Pedro enfrontouse con eles e destruíulles a meirande parte dos barcos. Os superviventes dirixíronse cara Al-Andalus.
Trala morte de Ordoño no 866, Pedro permaneceu fiel ao seu fillo e sucesor Afonso III fronte ao rebelde Froila Bermúdez, quen se proclamou rei en Oviedo no mesmos ano. Os condes galegos partidarios de Afonso conseguiron capturar ao usurpador e executárono.
Aparece como confirmante, xunto a Rodrigo de Castela, nun documento do 20 de xaneiro de 867 no que o rei Afonso III devolve a vila de Carcacía, que fora usurpada por Froila Bermúdez, á igrexa de Santiago de Compostela.[3]
Familia editar
Non se coñecen os devanceiros de Pedro, algunhas fontes din que puido ter sido o fillo de Vermudo I e Ozenda pero non hai probas ao respecto. Descoñécese con quen puido casar, pero normalmente adxudicanselle como fillos a:
- Vímara Pérez, primeiro conde portucalense.
- Hermenexildo Pérez, nobre que se levantou contra Afonso III. A única proba que existe do parentesco é o apelido.
Notas editar
- ↑ Mawer, Allen (2015). The Vikings. Palala Press. ISBN 978-1343400498.
- ↑ "Opera omnia, Chronicon Albeldense". archive.org. Consultado o 2023.
- ↑ Martínez Díez, Gonzalo (2004). El Condado de Castilla (711-1038) La historia frente a la leyenda. Junta de Castilla y León. ISBN 9788495379948.