Narciso Corral Ocampo
Narciso Corral Ocampo, nado nas Pontes de García Rodríguez o 11 de decembro de 1899 e finado en Madrid o 9 de xullo de 1959,[1] foi un político galego.
| Biografía | |
|---|---|
| Nacemento | 11 de decembro de 1899  As Pontes de García Rodríguez, España |
| Morte | 9 de xullo de 1959 (59 anos) Madrid, España |
| Alcalde das Pontes de García Rodríguez | |
| | |
| Datos persoais | |
| País de nacionalidade | España |
| Actividade | |
| Ocupación | político |
Traxectoria editar
Fillo de Andrés Francisco Corral Pico, secretario do Concello das Pontes de García Rodríguez, e Antonia Ocampo, estudou o bacharelato na Coruña.[2] Emigrou a Cuba e retornou a principios dos anos trinta. En principio fixo propaganda a favor de Leandro Pita Romero, pero posto a mal con el, pasouse á dereita. Foi nomeado representante da Sociedad de Autores de España nas Pontes de García Rodríguez en 1933.[3] Secretario do Comité Radical das Pontes, foi detido polo alcalde das Pontes en setembro de 1933, pero liberado ao día seguinte por orde do gobernador civil.[4] Aprobou os exames para secretarios de xulgados municipais en maio de 1935.[5] Dende decembro de 1935 militou na Falange. Foi secretario accidental do xulgado municipal das Pontes de 1936 a 1940.[6]
No golpe de Estado do 18 de xullo de 1936 era xefe de Falange das Pontes e estivo implicado na represión. Foi un dos responsables do masacre de Manuel Ramos Fernández, a súa muller Juana Ferreiro Rodríguez e dous dos seus fillos, Manuel e José o 22 de agosto de 1936. O 23 de outubro á fronte dunha partida de milicianos integrada por Francisco Bellas Rivero e José Seoane López Avelino asasinou ao esmoleiro Avelino López. En 1937 a Falange instruíulle expediente por impoñer multas arbitrarias e estivo preso un mes no cuartel de Falange da Coruña. Foi sancionado pola Delegación de Orde Público da Coruña con 100 pesetas en 1937 por "no saludar a las banderas nacional y de Falange, contestando a la Guardia civil en tonos airados e irrespetuosos al ser invitado a ello".[7] Entre xullo e outubro de 1937 foi soldado da setima bandeira de FET y de las JONS e combateu na fronte de Asturias. Foi nomeado alcalde das Pontes en xullo de 1940, cesando no cargo en maio de 1941. En agosto dese ano desmpeñou o cargo de secretario accidental do Concello das Pontes. En outubro de 1941 abríronlle un proceso xudicial polo homicidio de Manuel Ramos e a súa familia, que finalmente foi sobresido.[8] Foi expulsado de FET y de las JONS "por cometer actos denigrantes para la camisa azul" a finais de outubro de 1941.[9]
Vida persoal editar
Casou con María Villasuso Romero e foi pai de Valentín, María Luisa, Andrés, Otilia, Adolfo, Armando, María Elena e Pilar Corral Villasuso.
Notas editar
- ↑ La Voz de Galicia, 11-7-1959, p. 4.
- ↑ La Voz de Galicia, 25-6-1915, p. 3.
- ↑ El Ideal Gallego, 19-2-1933, p. 6.
- ↑ La Voz de Galicia, 9-9-1933, p. 6.
- ↑ El Ideal Gallego, 5-5-1935, p. 5.
- ↑ BOP A Coruña16-12-1938, p. 4.
- ↑ La Voz de Galicia, 1-7-1937, p. 2.
- ↑ Causa nº 133/1942, instruída polo delito de homicidios, contra Narciso Corral Ocampo e outros. As actuacións foron comezadas polo Xulgado de Instrución de Ortigueira o 8 de outubro de 1941 e continuadas polo Xulgado Militar eventual nº 3 de Ferrol, o 16 de febreiro de 1942.
- ↑ El Compostelano, 31-10-1941, p. 2.
Véxase tamén editar
Bibliografía editar
- Souto López, Manuel (2002). "II República nas Pontes de García Rodriguez, 1931-1936: Os Agrario-Republicanos" (PDF). Cátedra. Revista Eumesa de Estudios (9): 157–178. Arquivado dende o orixinal (PDF) o 07 de marzo de 2016. Consultado o 25 de xuño de 2015.
- Sande, María (2013). Alcaldes de As Pontes. Un recorrido desde 1836. A Coruña: Asociación Pro-Muevete. ISBN 978-84-616-6599-0.
Ligazóns externas editar
- Sergio Guerra Vilaboy: "La represión fascista en As Pontes en 1936" 23/8/2014.
- A represión fascista nas Pontes en 1936
| Predecesor: Jesús López López |
 Alcalde das Pontes de García Rodríguez 1940 - 1941 |
Sucesor: ? |