Manuel Allendesalazar Muñoz

Manuel Allendesalazar y Muñoz de Salazar, nado en Gernika-Lumo o 24 de agosto de 1856 e finado en Madrid o 17 de maio de 1923, foi un enxeñeiro e político vasco, Presidente do Goberno de España entre 1919 e 1920, e en 1921. Foi ademais, senador, deputado, presidente do Senado e alcalde de Madrid.

Manuel Allendesalazar Muñoz

Nome orixinal	(es) Manuel Allendesalazar Muñoz de Salazar
Biografía
Nacemento	(es) Manuel Allendesalazar y Muñoz de Salazar 24 de agosto de 1856 Gernika-Lumo, España
Morte	17 de maio de 1923 (66 anos) Madrid, España
Presidente do Consello de Ministros
13 de marzo de 1921 – 14 de agosto de 1921 ← Eduardo Dato Iradier – Antonio Maura →
Ministro de Mariña de España
19 de marzo de 1920 – 5 de xuño de 1920
Presidente do Consello de Ministros
12 de decembro de 1919 – 5 de maio de 1920 ← Joaquín Sánchez de Toca – Eduardo Dato Iradier →
Presidente do Senado de España
1919 – 1921 ← Alejandro Groizard – Joaquín Sánchez de Toca →
Ministro de Estado de España
xaneiro de 1907 – outubro de 1909 ← Juan Pérez-Caballero y Ferrer – Juan Pérez-Caballero y Ferrer →
Ministro de Gobernación
12 de maio de 1904 – 16 de decembro de 1904 ← José Sánchez Guerra – Francisco Javier González de Castejón y Elío →
Ministro de Agricultura, Industria, Comercio e Obras Públicas
decembro de 1903 – decembro de 1904 ← Rafael Gasset Chinchilla – Juan Armada Losada →
Ministro de Instrución Pública e Belas Artes
decembro de 1902 – xullo de 1903 ← Álvaro de Figueroa Torres-Mendieta – Gabino Bugallal →
Ministro de Facenda
xullo de 1900 – marzo de 1901 ← Raimundo Fernández Villaverde – Ángel Urzáiz →
Senador do Reino
Alcalde de Madrid
← Ventura García-Sancho Ibarrondo – Mariano Fernández de Henestrosa y Ortiz de Mioño →
Deputado das Cortes
Datos persoais
País de nacionalidade	España
Actividade
Lugar de traballo	Madrid
Ocupación	político , diplomático , empresario
Partido político	Partido Liberal-Conservador
Membro de	Unión Ibero-Americana
Lingua	Lingua castelá
Familia
Irmáns	Ángel Allende-Salazar y Muñoz de Salazar
Premios (1921)  colar da Orde de Carlos III

Foi ministro de Facenda durante a rexencia de María Cristina de Habsburgo e presidente do Consello de Ministros, ministro de Instrución Pública e Belas Artes, de Agricultura, Industria, Comercio e Obras Públicas, de Gobernación, de Estado, de Fomento e de Mariña durante o reinado de Afonso XIII.

Traxectoria

Primeiros anos

Allendesalazar, ministro de Facenda, fotografado no seu despacho por Manuel Compañy.

Manuel Allendesalazar, fotografado por Christian Franzen.

Naceu na localidade biscaíña de Gernika-Lumo. Fillo de Manuel María Allendesalazar y Loyzaga, terceiro conde de Montefuerte, e de Ángela Muñoz de Salazar y Martorell, oitava señora da vila de Villanueva de Tapia. Tras licenciarse como enxeñeiro agrónomo e impartir clases como profesor na Escola de Enxeñaría na que estudara.

Carreira política

Iniciou a súa carreira política no Partido Conservador con quen concorreu ás eleccións de 1884 sendo elixido deputado na Cortes pola circunscrición de Biscaia (distrito de Markina), escano que volvería obter nas sucesivas eleccións celebradas até 1891.

Ministro

En 1900, foi alcalde de Madrid e a partir desa data, foi ministro en varias ocasións. A primeira, entre o 6 de xullo de 1900 e o 6 de marzo de 1901, foi nomeado ministro de Facenda nun goberno de Azcárraga; posteriormente, ministro de Instrución Pública e Belas Artes entre o 6 de decembro de 1902 e o 20 de xullo de 1903 nun gabinete de Silvela; ministro de Agricultura, Industria, Comercio e Obras Públicas entre o 5 de decembro de 1903 e o 5 de decembro de 1904 nun goberno de Maura no que desenvolveu e favoreceu os proxectos de transformación do secaño en regadío; e ministro de Gobernación entre o 5 e o 16 de decembro de 1904 no mesmo goberno de Maura.

Tamén foi gobernador do Banco de España entre 1904 e 1905, e non sería novamente ministro ata que Maura o reclamou para que ocupase, entre o 25 de xaneiro de 1907 e o 16 de decembro de 1909, a carteira de ministro de Estado no chamado "goberno longo de Maura".

Tras esta etapa, Allendesalazar preferiu desempeñar cargos en empresas públicas, máis rendibles economicamente, e sería nomeado novamente gobernador do Banco de España (1919) e director de Tabacalera.

Volveu ser ministro, entre as súas dúas etapas como presidente do Consello de Ministros, nesta ocasión de forma interina, ao ocupar a carteira de ministro de Fomento, entre o 14 e o 17 de febreiro de 1920 nun gabinete de Dato, e a carteira de ministro de Mariña entre o 17 de marzo e o 5 de maio de 1920 nun goberno que el mesmo presidiría.

Caricatura de Allendesalazar durante a súa presidencia, obra de Tovar, publicada na Voz (Madrid) o 10 de maio de 1921.

Presidente do Consello de Ministros

En 1919, Antonio Maura nomeouno presidente do Senado, e a finais do mesmo ano Afonso XIII encargoulle presidir, entre o 12 de decembro de 1919 e o 5 de maio de 1920, un novo goberno. Con todo, cando o seu sucesor no cargo, Eduardo Dato, foi asasinado o 7 de marzo de 1921, o rei volveulle a encargar a confección dun novo gabinete que se estendería entre o 13 de marzo e o 14 de agosto de 1921. Neses momentos, a Batalla de Annual provocou unha crise no goberno que acabou de modo definitivo coa súa carreira política sendo substituído polo incombustible Antonio Maura.

Familia

Estivo casado con María de los Ángeles Bernar y Llácer coa que tivo unha filla, María de la Concepción de Allendesalazar y Bernar, dama da Orde das Damas Nobres da Raíña María Luisa, que posteriormente casaría con Manuel González Hontoria.

Véxase tamén

Outros artigos

• Lista de Presidentes do Goberno de España
• Lista de gobernadores do Banco de España.
• Lista de presidentes do Senado de España

Ligazóns externas

• Expediente persoal no Senado